Amanye amalunga ebandla lokholo lweUnited Methodist Church kwele Zimbabwe abangasekeli ukuthandana kwabantu abalobubili bunye batshengisele namuhla eHarare bayanikeza uBishop Eben Nhiwatiwa webandla labo insolo yabo besithi kumele kube lomhlangano wesiphangiphangi wokuhlaziya udaba lolu. Benze lokhu kulandela isinqumo esithethwe yinkokheli yebandla leli eMelika ethe sebevunyelwa ukutshada lokuba ngabafundisi abantu abalobulili bunye.
Amalunga ebandla leli abehlabela esigodlweni seUnited Methodist in Zimbabwe eHarare esithi isiqumo esithethwe yinkokheli yedale leGeneral Council kwele Melika siphambana lemilayo kaNkulunkulu.
Bathi okusobala yikuba ibandla seliphumile endleleni zika Mlimu ngakho-ke bafuna ukuba inkokheli yabo eZimbabwe iphumele egcekeni ukuba iyasekela ukuthandana kwabalobubilimi bunye loba hatshi.
Bathi okhokhela ibandla leli elizweni uBishop Nhiwatiwa kumele aqoqe umhlangano wesiphangiphangi ukuze kuhlaziywe udaba lolu. Lokhu kuchasiswa kabanzi nguMnu. James Kawadza obekhokhela akade betshengisela.
“Silibandla linye okwenzakala kwele Melika kuyasiphazamisa. Isono yisono ngoba ibhayibhili linye. Singathi akusiphambanisi njani bona baguqula umthetho webandla lethu? Siyakusola lokhu’’
Akade betshengisela basole kakhulu inyathelo lokuba kuhlonitshwe amalungelo abantu abalobubili bunye besithi lokhu kuphambana lemilayo yeBhayibhili. Omunye wabo nguMufundisi Simbarashe Maringosi othi lamasiko abensundu akakuvumeli lokhu.
“Thina silapha ngoba sifuna ukusola ububi lobu obungahambelani lelizwi leNkosi. Sithi lokhu kuyinto embi okumele singayamukeli yikho sitshengisela’’
Lokhu kusekelwe ngomunye obevela koBulawayo, uMnu. Erasmus Tshuma, othi kabasoze bagoqe izandla kusiba lomonakalo wokuvumela imikhuba yakwamanye amazwe.
“Kasisoze sivume ibandla lethu liphazamiseka. Izistabani kasizifuni loba kancane. Sizakulwisa lokhu ebandleni lethu’’
IStudio 7 yehlulekile ukukhuluma loBishop Nhiwatiwa kodwa osebenza ewofisini yakhe, uMnu. Allan Gurupira, uthi bayitholile incwadi yokutshengisela okwenzakale namuhla. Okhokhela inhlanganiso yabantu abalobubili bunye kwele Zimbabwe uMnu. Chester Samba uthi kulilungelo lalabo abatshengiselayo kodwa vele umthetho weZimbabwe kawuvumeli ukutshadiswa kwabo kuleli. Uthi kumele uzulu ahloniphe amalungelo abo.
“Siyathaba ukuba bavunyelwe ukutshengisela. Ukutshengisela lokhu kuphazamisa abantu abalobubili bunye. Ibandla kumele libamukele. Njengelizwe asila mthetho ovumela lokhu, ukutshengisela kwabo akulandaba’’
Uhulumende we Zimbabwe lobanje engasekeli ukuthandana kwabantu laba, isisekelo sombuso welizwe kasicaci ngokuthandana kwalaba bantu kodwa kasivumeli ukutshadiswa kwabo emacaweni loba emithethwandaba.
Ngomnyaka odluleyo, umsekeli kamongameli welizwe, uMnu. Constantino Chiwenga, waloba incwadi esola ukuphiwa koncedo lokufunda kwabantu abalobubili bunye esithi kumele beme izenzo ezimbi. Kodwa inhlanganiso ezizimeleyo zathi lokhu yikwephula amalungelo abo.
Ibandla leUnited Methodist Church lilakho ukudabuka phakathi ngemva kokuba elinye lamandla lawa kwele Ivory Coast elilabantu abafika isigidi lazise ukuba seliphumile kumanyano wezinkonzo zeUMC ngenxa yesinqumo sokuvumela ukutshadiswa kwabathandana ngobulili bunye. Ukutshengisela okwenzakale namuhla eHarare kulakho ukuba yinhlanyelo yokudabuka kwebandla leli eZimbabwe.
Forum