Inhlanganiso ezizimeleyo lazo sezingenile emkhankasweni wokuthi umsekeli kamongameli welizwe, uMnu. Phelekezela Mphoko asuke ehoteleni lapho asehlezi khona elokhu wakhethwa ukuba ngumsekeli kamongameli ngoMpalakazi ngomnyaka ka 2014.
Ihotela lapho ahlala khona uMphoko, iRainbow Towers ihlawulisa amadola angafika amakhulu ayisikhombisa ngelanga abantu ababili. UMphoko ubikwa ehlala lomkake kunye lomzukulu ndawonye labamlindayo labamphathisayo abambalwa. Imali esisetshenziswe ekuhlaleni kukaMphoko isedlule ingxenye yesigidi samadola.
Ngomnyaka ophelileyo uhulumende wathi usemtholele indlu eyizigidi ezine zamadola kodwa akwaziwa ukuthi uzangena kuyo na ngoba umkake ebikwa enguye othi kazifuni zonke izindlu abazikhethelwayo.
Inhlanganiso yeCrisis in Zimbabwe Coalition, yona elamalunga angafika phose ikhulu ithi kuyamangalisa ukuthi uMphoko engahlala sibili ehoteleni okwesikhathi eside kangaka esebenzisa imali enengi kanje okuyindleko ehlalwulelwa yimithelo kazulu ozihawulelayo zona izisebenzi zikahulumende zingela mali lozulu makhaza esidla ingqweqwe zomlomo.
Isikhulumeli salumanyano, uMnu. Dumisani Nkomo utshele iStudio Seven ukuthi bafuna uMongameli Mugabe amxotshe ehoteleni bgokuphangisa uMphoko.
"Okudanisayo yikuthi siyananzelela ukuthi uhulumende uveza ukuba akalandaba lenhlalakahle yabantu, kusimo somnotho selizwe esingamanga kuhle, ababalisi lezisebenzi zikahulumende abatholanga iholo, uyabacasisela uthini abantu abathwele nzima kangaka ukuthi kakula mali yona itshaphazwa ngokuhlawulela ukuhlala kukamsekeli kamongameli ehoteleni edulayo kangaka?"
