Ukuvulwa kwezikolo ngoLwesibili, kukhalisa abazali abanengi abathi abantwana sebeyaqala ukudla okungahlanzekanga okuphekwa ezikolo.
Abazali besaba ukuthi abantwana bangahlaselwa yisihudo seCholera, okungela siqiniseko sokuthi isiphelile elizweni.
UNkosikazi Linda Moyo, ongumzali wako Bulawayo, uthi ukudla lokhu kuphekelwa endaweni ezingahlanzekanga okuyikho okwenza abantwana begule.
“Ziyavulwa izikolo, abantwana sebeqala ukudla, ukudla okungahlanzekanga. Imbiza lezi zigeziswa zingahlambuki, abapheki labo bakhanya bengahlanzekanga. Mina ngithi uhulumende kakhiphe isinqumo sakhe sokuthi abantwana bephekelwe ezikolo, ngoba kuyingozi kumpilakahle yabantwana.”
Omunye njalo umzali wako Bulawayo, uNkosikazi Tabeth Mpofu, uthi indaba ye-feeding ayimphathi ngoba ethi kakwazi ukuthi ukudla lokhu kulungiswe ngandlela bani, phakathi kwembiza ezinjani. Ngabe abantwana baphiwa amahewu, bekungaba ngcono.
“Indaba leyi ye-feeding, mina ngizazikhulumela ngedwa ngokwami ayimphathi sibili ngoba angikwazi ukuthi ukudla lokhu nxa kudliwa kuyabe kuvele kulungiswe njani, kuvele kuphekwe phakathi kwembiza ezinjani, hayi mina ngithi ngabe abantwana baphiwa izinto ezinjenga mahewu, ngaze aphiwe kanye ngeviki kungcono kakhulu, kolokuphiwa ukudla esingaziyo ukuthi kuphekwe njani.”
UNkosikazi Zandile Zulu, olomntwana ofunda esikolweni seNkulumane, uthi ukhathazekile ngendaba yokuphekelwa kwabantwana ezikolo ngoba ethi imali leyi isuke yafakwa ndawonye leSchool Fees.
“Izikolo ziyavulwa kusasa mina ngilestress ngendaba yefeeding yabantwana. Okungikhathaza kakhulu yikuthi imali bayifaka kufees, yet asikwazi ukuthi kuhlanzeke okungakanani. Owami umntwana wabuya ekhala ngesisu wangitshela ukuthi itshakada abalidlayo lilemphehlane, alifakwanga mafutha lesawudo. Imali le ayehlukaniswe, thina abazali kubeyithi esikhethayo ukuthi adle kumbe hayi. Khathesi kule cholera sile fear ukuthi kuhlanzeke okunganani.”
UMnu. Marthe Siziba, olabantwana abafunda ezigabeni ezitshiyeneyo abanye beseboarding labafunda besuka ngekhaya, uthi abazali bayenelisa ukuthi abantwana abafakele imphako yokudla esikolo ngako ubona kungela sidingo ukuthi baphekelwe esikolo.
“Njengomzali olabantwana abaya esikolo ayingijabulisi indaba yefeeding. Ifeeding leyi ilamanye amacharges."
