Abazali labafundi bathi bakhathazekile kakhulu ngesinqumo sikahulumende sokuthi bahlawule imali yesikolo bona abafundi bengafundanga okwesikhathi esingayi landawo lokhe zavulwayo izikolo kulandela ukuvalwa kwazo ngenxa yobhubhano lweCovid-19 ngoMbimbitho. Bathi bekungamelanga bahlawuliswe linhlawulo ngale iterm ngoba abafundi bengafundanga lutho.
Lonyaka eleZimbabwe njengawo wonke amazwe womhlaba libhekane lobunzima kunhlangothi ezitshiyeneyo zempilo obudalwe yikuqhamuka kweCovid 19.
I-Covid 19 ibangele ukuba izikolo zivalwe NgoMbimbitho zaze zaqala ukuvulwa ngoMpandula. Kuthe laloba sezivuliwe, uhlangothi lwezemfundo luphinde lwabhekana lolunye uhlupho lokukhalala umsebenzi kwababalisi okubangele ukuba abafundi bengafundi kodwa nanku sebehlawuliswa indleko zesikolo.
UNkosikazi Nobukhosi Mthethwa isakhamuzi seNkulumane koBulawayo uthi uhlukumezekile ukuhlawuliswa kanje kodwa abantwana bengafundanga lutho.
“Sikhathazekile kakhulu njalo sihlukumezekile ngesimo esisezikolo, abafundi bavulile izikolo bafunda amalanga angedluli iviki kodwa sekumele sihlawule imfanelo zesikolo ngapha abafundi bengafundanga lutho kuthi abanye sebebhala imihloliso bona bebengafundi kuthi abanye sebevala izikolo kodwa kumele babhadale imali zonke zesikolo singekela kulakho ukusihlupha kusasa.”
UNKosikazi Nompumelelo Ndlovu ngomunye wabakhalaza ngokuhlawula imali yesikolo bona bengafundanga.
“Abantwana abazange bafunde kodwa sikhangelwe ukubhadala imali engange$4000. Abafundi bebefika esikolo balindwe ngabaphathi besikolo bengafundi. Owami umntwana ufunde inombolo kuphela.”
Olwela amalungelo oluntu uNkosikazi Patricia Tshabalala ngomunye wabasola ukuphathwa kodaba lwemfundo nguhulumende ngalesi sikhathi seCovid 19.
“Umnntwana ubhadaliswa $1500, kuthi abakaMatsha abaphiwayo kuyahamba njan,i abemfundo yaphezulu bahlawuliswa imali enengi ama$7 000, $3 000 kumbe $4000. Ababalisi labo besaba ukuthatha imikhuhlane abafundi bona babhalani bafundani. Kungani kungalungiswa kuhle ezemfundo. Ilizwe lethu ngelokwethusela ngabe izikolo zingavulwa loba umnyaka uphele ozayo bengafundi yonke into ihlelekile ezikolo ngoba akusizi ukuthi kuthiwe abafundi baye esikolo bangafundi qede lapho bahlawuliswe izimali eziphezulu ngapha bengavikelekanga kuCovid-19.”
Okwamanje abanye abafundi baphakathi kokuloba imihloliso kodwa bengenelisanga ukufunda kuthi abanye sebesemakhaya ngoba kulabaloba imihloliso njalo abazali bakhangelele ukuba bahlawule imali yesikolo okuyinto abathi iyabahlukumeza.
Ugatsha olubona ngezemfundo solwethule imibiko ethi abafundi kumele bahlawule imali yesikolo kungakhathalekile lokuthi bafundile kumbe hatshi njalo izikolo zizavalwa abantu besiya kukhefu leKhisimusi ziyevulwa mhlaka 4 Zibandlela kungakhathalekile lokumemetheka kweCovid-19 le, esiqale katsha ukumemetheka.
Kunje iCovid 19, isihlasele izikolo ezimbalwa inengi lazo ezingenelisi ukulandela iziqondiso zokuvikela ukumemetheka kweCovid -19 ngoba zingelayo impahla yokuzivikela enjengama mask, bengela manzi wokugeza izandla loba imithi yokulondoloza ukuhlanzeka eyamasanitisers. Umhlubulo weMandebeleni iyowo osuhlaselwa ngamandla ukwedlula ezinye izigaba zelizwe zilezikolo ezimbalwa esezivaliwe ngenxa yeCovid 19, ezigoqela oJohn Tallach, Matopo Mission, Mtshabezi Mission lezinye.
