UNkosikazi Grace Mugabe usole ukudonselana kubandla leZanu PF ngoLwesine, esithi abaxabanayo laba zinhlanya zabantu.
Ekhuluma emhlanganweni awenzele eChimanimani, uNkosikazi Mugabe ukhuthaze amalunga alelibandla ukuthi ahlalisane njalo esebenzelane ndawonye.
“Ukudonselana yinto engalunganga. Awulunganga lumkhuba njalo abenza lokhu kumele bakwekele,” kutsho uNkosikazi Mugabe emhlanganweni ongenwe zinkulungwane zabantu.
Uthe njalo abalimi abaphiwa amapulazi abangawasebenzisiyo kumele bawubisele kuhulumende aphiwe abantu abelolwazi lamandla okulima.
“Bakhona abantu abaphiwa amapulazi kodwa abawasebenzisi,” kuqhubeke uMugabe.
“Ngakho ngizaqhubeka ngikhankasela ukuthi kukhangelisiswe udaba lokwabiwa komhlabathi kube le audit ukuze kubonakale ukuthi liyawasebenzisa yini amapulazi njengokukhangelelwe nguhulumende.”
UNkosikazi Mugabe ucele njalo umphathintambo wezamagetsi uMnu Samuel Undenge ukuthi abalimi bengacitshelwa amandla kagetsi.
Ingcwethi kwezombusazwe uMnu Mmeli Dube utshele iStudio 7 ukuthi okwenza ukudonselana kubandla leZanu PF kuqhubeke ngumbango wesikhundla sikaMongameli Mugabe.
“Angiboni ukuthi ukhona kuZanu PF khathesi omsulwa ongathi akula hlangothi alusekelayo,” kutsho uMnu Dube.
“Ngitsho laye uMugabe uyake ekhulume ezikhanyela ukuthi lukhona uhlangothi alusolayo njalo lukhona alusekelayo.”
Ukudlephana kubandla leli kuphume sobala kunyanga ezisanda kwedlula lapho okuxotshwe khona iziphathamandla ezinengi ezigoqela owayengumsekeli kaMugabe uNkosikazi Joice Mujuru.
UMujuru wayesetheswa icala lokuzama ukugenqula umbuso kaMugabe njalo waxotshwa lezinye iziphathamandla ezigoqela uMnu Didymus Mutasa, uMnu Rugare Gumbo, uMnu Jabulani Sibanda, uMnu Themba Mliswa labanye.
