Abavoti beleMelika sebekhangelane lomkhankaso omutsha kulandela ukuphuma kulolukhetho kukaMongameli Joe Biden njalo umsekeli wakhe uKamala Harris ekhangelelwe ukuba nguye ozakhethwa libandla leDemocratic Party ukuthi ancintisane loDonald Trump ngoLwezi. Intathelizindaba yeVOA uScott Stearns ukhangela ukuthi abavoti bakwamukela njani lokhu.
UEric Boylan umvoti wase Scranton ePennysylvania lapho okudabuka khona uJoe Biden uthi ibandla leDemocratic Party belingasela ngenye indlela ngaphandle kokukhupha uBiden.
"Ngibona sengathi ubengumkhokheli omuhle. Kodwa ngiyavuma ukuthi isikhathi sokuthi adedele omunye besesifikile," kutsho uBoylan.
Umvoti uKristine Stoll uthi nxa uBiden engela mandla okungena njalo kukhetho kufanele ahle atshiye isikhundla sokuba ngumongameli.
"Kwakufanele atshiye kudala, kufanele asuke eWhite House. Ingqondo zakhe azisasebenzi kuhle kasenelisi ukukhokhela ilizwe."
Ukukhetha umsekeli kamongameli uKamala Harris ukuthi angene kulolukhetho kwengeza amathuba ebandla leli okuncintisana lowebandla leRepublican Party u Donald Trump, kutsho umvoti uDaniel Brennan.
"Ucwaningo luveza ukuthi uHarris uyancintisana loTrump. Ngakho, ngicabanga ukuthi amathuba okunqoba ulawo. Njalo ngibona angathi wenza into elungileyo laloba abanye bengahlalisekanga besithi yikungaqoqeki."
Umvoti wePennsylvania obevakatshele eWashington uBill Mills uthi uHarris loBiden behluleka ukuthuthukisa umnotho bendawonye.
"Sinanzelela ukuthi intengo yempahla lamafutha emota ikhwelile njalo impilo zethu sezinzima. Njalo konke lokhu kwenzakala ngesikhathi uHarris engumsekeli kamongameli. Ngakhoke kuzakuba nzima ukuthi abantu bembone ngendlela etshiyeneyo njengoba sonke sibone umnotho welizwe usiwa sikhangele.”
EMichigan, umvoti uJason Potts uthi utshintsho lolu lupha ibandla leDemocratic Party ithuba lokuxhumana labavoti abatsha.
"Ngibona sengathi bebedlulisa isikhathi kuphela bemelele ukuthi bathole omunye umuntu oqinileyo. Njalo sizabona ukuthi uKamala uqinile na. Okwakhathesi umlilo ulawo sibili, uyavutha.”
Engumsekeli kamongameli uHarris wayelwisana lokungena kweleMelika kwabokuza okungekho emthethweni. Umvoti weFlorida uChristopher Ran Gil uthi ukwehluleka kwakhe ukuqeda loludubo kuveza ukuthi akangeke enelise ukuba ngumongameli.
“UKamala yidoti. Uyedlula uJoe. Bayafana nje. Angiboni ukuthi kulomuntu ozavotela uKamala. Akulamuntu ofuna ukumsekela. Wayelomsebenzi owodwa, ukulungisisa udubo lomngcele.”
EWashington, umvoti u-Alicia Jefferson uthi ulethemba lokuthi abantu abasoze bebone umsekeli kamongameli njengowesifazana onsundu kuphela kodwa bazabona imisebenzi yonke ayifezayo.
"Ngifisa ukuthi abantu bekhangele imisebenzi yakhe. Kodwa kulumhlaba esiphila kuwo, abanye abantu bengakwenza lokhu kodwa abanye abasoze. Njalo ngifisa kungabi labantu abanengi abamisa ukungena kwakhe ngoba engowesifazane onsundu."
Isakhamuzi seNew York, uAndrew Varshavsky uthi kuzakuba nzima ukunqoba uTrump.
“Ukuthi nguBiden kumbe ngomunye ongena kulolukhetho emele ibandla leDemocratic Party akulethi mahluko, lowu ngumncintiswano kaTrump. Ngingowebandla leDemocratic Party kodwa ngibona sengathi kuzakuba nzima ukunqoba kulolukhetho.”
UHarris kukhanya usethole usekelo lwabamela izigaba ezinengi, abadingakalayo ukuthi akhethwe ukumela ibandla leli kukhetho kodwa ozamela lelibandla kukhetho uzakhethwa okusemthethweni emhlanganweni omkhulu oweDemocratic National Convention eChicago.
Forum