Kulezizalwane zeZimbabwe ezithunjwa ngabantu abangaziwayo nxa zitshengisela ezitaladini zikhonona ngesimo somnotho esibi elizweni njalo lombuso kaMongameli Robert Mugabe abathi ngowocuku.
Zimbalwa izizalwane lezi, ezigoqela uMnu. Silvanos Mudzvova, ezikezathunjwa lonyaka ngabantu laba abacatshangelwa ukuthi basebenzela uhulumende.
Abatshengisela ezitaladini bathi bazaqhubeka besenza lokhu loba abanye babo bayake bathunjwe batshaywe okumangalisayo ngabantu laba okukhanya belezibindi zokubulala.
Asenelisanga ukukhuluma lamapholisa kanye leziphathamandla zikahulumende ngodaba lolu.
Ukuze sizwe okunengi ngokuthunjwa kwabatshengiselayo, iStudio 7 ixoxe loMnu. Charles Nyoni okunhlanganiso yabatshengiselayo eyeOccupy Africa Unity Square ekhokhelwa nguMnu. Itai Dzamara oselisikhathi wathunjwa ngabantu abangazakaliyo.
UNyoni uthe kabasoze bayekele ukutshengisela ezitaladini ngenxa yokuthunjwa kwabantu abambalwa yilabo abacatshangelwa ukuthi bakuhulumende kaMongameli Robert Mugabe.
“Kuyasethusa kodwa kasisoze sikuyekele lokhu. Akwenzakali ukuthi bangathumba ilizwe lonke.”