Abatsha bakhuthazwa ukuthi badwebe abakufisayo njalo benze eminye imisebenzi yezandla ukwenzela ukuthuthukisa inotho yabo. Inkuthazo le yenziwe yinhlanganiso yeViking Techno eqoqe umbukiso wokuveza ubuciko obenziwa ngabasakhulayo koBulawayo. Intathelizindaba yethu uBathabile Masuku usethulela loludaba ngokugcweleyo.
Intsha yako Bulawayo ibuthane ngoMvulo egcekenui lezimota eleCity Hall belande uhlelo obelubizwa kuthiwa yiThe Bulawayo Youth Economic Freedom Expo obeluqoqwe yinhlanganiso yeViking Techno.
Umbukiso lo uqalise ngentsha yakoBulawayo ibonakalisa ekwenza ngezandla okugoqela ubuhlali bezandleni kanye lezikhwama zamangqongqo.
Isikhulumeli salinhlanganiso le, uThamsanqa Gumpo, uthi intsha yako Bulawayo kumele ibonakalise ubuciko bokwenza imisebenzi etshiyeneyo obenziwa ngezandla.
“IExpo leyi yenzelwe ukubona ukuthi koBulawayo vele kwenziwani lokuthi kuphakanyiswe abantu abatsha abenza amabhizimisi kumbe imsebenzi yezandla. Kukhangelelwe njalo ukuthi bengathola ukucetshiswa ngabanye abantu abanxusiweyo.”
Omunye obebukisa akwenzayo, uNtombizodwa Ndlovu, uthi bona njengentsha bahlutshwa yimali yokusebenzisa kanye lemikambo yokuthengisela lanxa okokuthengisa beyabe belakho.
“Imali yiyo esikhathazayo kakhulu ngoba siyabe sifisa ukuhlala silezinto ezinengi esizenzayo. Indawo zokuthengisela lazo ziyasihlupha ngoba siyafisa lokuthengisela ngaphandle kwelizwe.”
UMnu. Emmanuel Matsika, oselesikhathi eside esenza imisebenzi yezandla othengisela eCity Hall, ukhala ngokuthi abantu sebebanengi abenza imisebenzi yezandla njalo sebegcwele indawo yonke okubangela ukuthi intengo yempahla abayenzayo ingasaqondiseki kakahle.
“Thina esikubhizimusi lokuthengisa iArt yikuthi abantu sebegcwele indawo yonke ngenxa yabantu abayabe befuna ukuthengisa kucine kubangela ukuthi intengo ingasaqondiseki kahle.”
Obengumhlonitshwa kulumhlangano, uMnu. Lewis Mathuthu, olilunga labontanga kubandla leZANU PF, ukhuthaze abatsha bakoBulawayo ukuthi bengasaleli emuva kodwa labo baphatheke ekuyeni thatha imali esambeni esisungulelwe abasakhulayo ukuthi babone ukuthi bengasizakala njani.
Uthi amaqembu akhe alindele ukuthi bonke abasakhulayo babuye kubo babaphathise.
Ungezelele njalo esithi uhlelo lwakuqala lwaphelela eHarare kodwa lolu luhlelo oluzagoqela ilizwe lonke.
Uthe wonke umuntu omutsha, kungakhathalekile ukuthi uvela kuliphi ibandla lezombangazwe, uvunyelwe ukuyathatha leyomali nxa efuna ukuyisebenzisa ukuzithuthukisa.
