Ikhansili yeHarare ithi ingenelisa ukupha imvumo kwabathengisa impahla ezitshiyeneyo ezitaladini abafika amakhulu ayisithupha kuphela-6000 enkabeni yedolobho ngakho abanye abedlula inkulungwane ezingamatshumi amabili 20 000 bazakuyathengisela emngceleni wedolobho kanye leduzane lezindlu zabantu emalokitshini.
Umabhalane walelidolobho uMnu. Tendai Mahachi utshele iStudio 7 ukuthi kusukela ngoLwesine amapholisa azaxotsha abathengisa ngokungekho emthethweni kulelidolobho
Kodwa inhlanganiso elwela amalungelo abathengisayo eye National Vendors Union of Zimbabwe ithi ayisoze ivume ukuthi amalunga ayo asuswe ezitaladini ikhansili ingakawadingeli ezinye indawo zokuthengisela.
Lokhu kulandela isiqondiso sikamphathintambo obona ngokwabiwa kwezabelo uMnu. Ignatious Chombo esokuthi abathengisa ngokungekho emthethweni besuswe ezitaladini emadolobheni wonke ukuze kuhlanzeke.
Kusenjalo uKhansila Charles Moyo, umgcinisihlalo wekhomithi ebona ngokwabiwa kwendawo-eye Town Lands and Planning Committee edolobheni lakoBulawayo utshele uSithandekile Mhlanga weStudio 7 ukuthi ikhansili yakhe izahlangana labathengisayo ngoLwesihlanu ukuhlaziya loludaba, njengoba phose ingxenye yabantu kulelidolobho bethengisa ngenxa yokuvalwa kwamafekithali.