Izipho lezi ziqoqwe enhlanganisweni ezisebenza lomansipala wako Bulawayo njalo zinikezwe inhlanganiso ezingamatshumi amabili lanye.
Ekhuluma emkhosini lo umfundisi Kilton Moyo ongumgcinisihlalo weMayor’s Cheer fund uthe lonyaka bathole inkulungwane ezingamatshumi amathathu (USD32 000). Uthe phezu kwalokho okunikezwe namhla bazanikeza njalo abantu abangaphezu kwenkulungwane ezine (4500) abaqoqwe yinhlanganiso kahulumende eyeSocial Welfare.
Umqondisi wezemali kumansipala wakoBulawayo umnumzana Zenzo Ndimamde uthe lesisenzo sijonge ukuletha injabulo kulabo abangatholiyo, uthe isikhwama sika Meya siding ukunikezwa izipho ukuze benelise ukunikeza abaswelayo.
Abanye balabo abamukele izipho bathe bayajabula kakhulu ngezipho lezi. Unkosikazi Patricia Tshabalala owe Vulindlela Gardens Orphan Care uthe ubonge kakhulu ethi inhlanganiso yakhe igcine intandane njalo isipho lesi sizabasiza kakhulu.
Unkosikazi Nosihle Ndlovu owe Revival of Hope ekhangele abantu abaphila legcikwane labalobugoga. Lawye ubonge isipho abasitholileyo ethi kuqakathekile ukuthi abahluphekileyo bakhunjulwe.
Kulemthimba eminengi eqoqelwe abahluphekileyo ngekhefu lekhisimusi leyi. Unkosikazi nesisa Moyo wazise iStudio 7 ukuthi kusasa kuyabe kuledili lokudla (DINNER) ehoteleni enkulu eyeHoliday Inn lapho intandane ezizazijabulisa khona. Inhlanganiso yerevival of Hope layo iqoqe umthimba wemodelling eMacdonald Hall eMzilikazi.
