Abasekeli beMDC ekhokhelwa nguMnu Morgan Tsvangirai ababotshwe ngeSonto phezu kokubulawa kwelinye ipholisa eHarare bebelokhe bevalelwe ngoLwesine lanxa isikhathi sokuthi bahanjiswe emthethwandaba besesidlulile.
Amagqwetha abantu laba, bona abangamatshumi amabili lanhlanu, atshele iStudio 7 ukuthi abanye babo bahlukuluzwe kabuhlungu ngamapholisa.
Ukubulawa kukaInspector Petros Mutedza sokubangele ukufuthelana okukhulu phakathi kamapholisa leMDC, njalo abakhulu bamapholisa bathi bazajeziswa kabuhlungu abazatholakala beyibo abadala lelicala.
Ukuhlaziya loludaba sixhume ingcwethi ezicubungula ezombusazwe uMnu Rejoice Ngwenya loMnu Effie Dlela Ncube bona abathi amapholisa lawo ayaphambanisa kakhulu ngokuhlukuluza uzulu mahlayana.
