Abasakhulayo beZanu PF batshengisele ezitaladeni zeHarare ngoLwesithathu besola ukuqhubeka kwezijeziso ezethulelwa uMongameli Mugabe lezinye iziphathamandla zebandla leli, besithi bafuna zesulwe.
Abasakhulayo laba bafole besuka emawofisini ebandla labo bayakuma esigodlweni sabameli beMelika eZimbabwe, behlabela ingoma ezichothoza uhulumende weMelika njalo besithi bafuna imisakazo esakaza ingaphandle kwelizwe efana loweStudio 7 ivalwe.
Abatshengiseleyo laba bebesedlula inkulungwane, 1000. Bebechothoza njalo inhloko kahulumende uMnu Morgan Tsvangirai besithi kakhankaseli ukwesulwa kwezijeziso ezethulelwa uMugabe labanye bakhe kuZanu PF ngamazwe angentshonalanga.
Ngesikhathi sokutshengisela lokhu, esinye isiphathamandla seMelika esibona ngezomnotho esigodlweni seMelika eZimbabwe uMnu James Garry ube lomhlangano lentathelizindaba eHarare wachasisa imbono yelizwe lakhe ngokubuyiselwa kweZimbabwe amalungelo ayo yi IMF.
U Garry uthe lokhu kuyinto enhle njalo engenza eleZimbabwe livuselele njalo ubudlelwano balo lamanye amazwe omhlaba. Wengeze wathi izijeziso ezikhona zafakwa ngezizatho ezithile njalo ukwesulwa kwazo kuzakuya ngokuthi sokulungisiswe konke okwabangela ukuba zibekhona na.
U Garry uthe akusiqiniso ukuba izijeziso lezi ziphazamisa umnotho weZimbabwe, esithi ziphazamisa labo ezikhangelane labo kuphela.
Ingcwethi ecubungula ezombusazwe uMnu Samukele Hadebe utshele uNtungamili Nkomo weStudio 7 ukuthi kaboni amazwe angentshonalanga ekutshaya indiva ukutshengisela kwabeZanu PF lokhu phezu kwezijeziso.
