Abasakhulayo abasedolobheni leGwanda batshengisele besola inkohlakalo abathi ibavalela amathuba okuthola imisebenzi. Abasakhulayo laba babhode ngezitalade zeGwanda bekhuthaza uzulu ukuthi alwisane lenkohlakalo.
Lumkhankaso oqoqwe ngabenhlanganiso yabasakhulayo eyeCommunity Youth Development Trust CYDT phansi kwendikimba ethi SayNo2corruption ubujonge ukukhuthaza uzulu ukuthi atshiyane lenkohlakalo ukuze kube lentuthuko elizweni.
Inengi lezakhamizi likhale ngokuziphatha kwamapholisa kumbuthano lo oqhutshelwe emavikilini eJahunda.
Omunye wabasakhulayo laba, uProlific Noko uthi inkohlakalo ekhona elizweni isidale ukuthi abanye abafana laye abasuka ezimulini eziswelayo behluleke ukungena emakolitshini kumbe ukuthola umsebenzi.
Omunye njalo osakhulayo uSithembinkosi Gumbo uthi loba nje iGwanda igcwele igolide, abaphiwa indawo zokugebha ngabalezikhundla.
Umsekeli womqondisi zenhlelo zeCYDT uMnu. Norman Mudadisi ukhuthaza abatsha ukuthi bengaphatheki kulinkohlakalo.
Okhulume emele amapholisa uthi uzulu akumelanga esabe ukubika amacala aphathelane lobugwelegwele.
Loba nje uMongameli Emmerson Mnangagwa esithi uzalwisana lenkohlakalo njalo kuzabotshwa yiloba ngubani olecala, uMnu Wellington Nare uthi kakholwa ukuthi uzimisele kulokhu.
EleZimbabwe ngelinye lamazwe akuzwekazi leAfrica ahamba phambili kudubo olwenkohlakalo osekudale ukuthi lisalele emuva kakhulu kwezentuthuko.
