Abaqondisi bamankampani emazweni abanikwe isikhathi esifitshane ngeviki ephelileyo ngumphathintambo wezokuthuthukisa inotho kazulu uMnu. Saviour Kasukuwere ukuthi baqalise ukwabela uzulu amashares akhuphukileyo, bathi sebekukhulumisana lohulumende ngalolu daba ukuze bengawathathelwa.
Abaqondisi laba bathi balakho ukukhuphula amashares okumele bawabele uzulu ukuze afike kuyisilinganiso esedlula okungamatshumi amathathu ekhulwini.
Amankampani la ake athi kuqala azimisele ukwabela uzulu amashares angaba yisilinganiso sokungamatshumi amabili lanhlanu ekhulwini-25%, okwaliwe nguhulumende ekhonona ngokuthi lokhe efuna isilinganiso esedlula amatshumi amahlanu ekhulwini-51%.
Abanye babaqondisi laba bathi sebedinga uncedo emagqwetheni ukuze balwisane lohulumende emthethwandaba nxa ezama ukuthatha amankampani abo kumbe ukuwavala.
Kusenjalo, ukulwisana kuka Mnu.Kasukuwere losibalikhulu we bhanga le Reserve Bank of Zimbabwe uMnu. Gideon Gono kuqhubekela phambili.
Umnu. Kasukuwere lokhe esithi uzathathela amabhanga anjenge Barclays le Standard Chartered ama license nxa engethulanga indlela yokwabela uzulu amashares.
Ingcwethi kwezenotho uMnu. Rejoice Ngwenya uthi uMnu. Gono wenza kahle ukuthi alwele amalungelo amabhanga eZimbabwe.
