Abalandeli bebandla leZapu bathi labo abasala kubandla leZanu PF ngabantu abazimeleyo hatshi abenza okwakufunwa ngumuyi uJoshua Mqabuko Nkomo kulandela ukubulawa kwabantu abanengi yiGukurahundi eMatabeleland leNkabazwe kusukela ngomnyaka ka1982 kusiya umnyaka ka1987.
Bathi akulalutho olubambekayo olwalethwa ngumanyano wamabandla la ngaphandle kokumiswa kombhuqazwe weGukurahundi.
Kodwa abasala kubandla leZanu PF, ngesikhathi umuyi uDumiso Dabengwa labanye besuka kulo, bathi bazaqhubekela phambili bekubandla elibusayo. Ibandla lePF Zapu lamanyana lele Zanu mhlaka 22 Mpalakazi ngomnyaka ka1987.
UMnu. Mthulisi Hanana, unobhala jikelele webandla leZapu, uthi abasele kubandla leZanu PF ngabafuna ukunotha ngendlela ephansi.
UHanana uthi basuka bonke ababelezikhundla kubandla lePF Zapu lingakabambani lele Zanu ngomnyaka ka1987.
Uthi kuyamangalisa ukuba kulabanye abalokhu besithi kulomanyano wamabandla la.
UMnu. Joseph Tshuma, okudale leCentral Committee, kubandla elibusayo, uthi ibandla leZapu lokhu libambene lele Zanu.
UTshuma uthi abasuka kubandla leZanu PF babumba ibandla elitsha eleZapu.
UNkomo wacela abantu ukuba bengene kumanyano wamabandla la kulandela ukubulawa kwabantu abafika inkulungwane ezingamatshumi amabili – 20,000 eMatabeleland leNkabazwe esakhokhela ibandla lePF Zapu.
