Abaphila ngokuthengisa bathi ukuhlupheka kwabo sokwengezelelwa yikuswelakala kwendawo eziqondileyo zokusebenzela.
Inengi labo likhala ngokuthi lokhe lingakatholi uncedo lwemali abayithenjiswa nguhulumende ngesikhathi ilizwe likuhlelo lokuvimba ukumemetheka kwegcikwane leCovid 19, olwe Lockdown.
Selokhe kwavalwa indawo zokuthengisela ekuqhamukeni kweCOVID 19 ngoMbimbitho lonyaka, abaphila ngokuthengisa basebenza nzima ukuthi baziphilise. Inengi lithengisela endaweni ezingavunyelwa ngukhansili wakoBulawayo.
Umnunzana Mkhokheli Ndlovu isakhamuzi seMagwegwe koBulawayo, ophila ngokuthengisa uthi basebenza nzima ngoba betshona bedlala umacatshelana lamapholisa.
“Indawo esasithengisela kizo lokhe singakabiselwa ezinye sezahle zavalwa kwathiwa asisathengiseli khona sizadinga ezinye indawo, kodwa ngiyamangala ukuthi why into yakhona ilokhe iphuza ngoba thina siphila ngokuthengisa nxa singathengisanga kubanzima ukuthi siphile ngoba akula source of income esilayo. Lokhu yikho osokudala ukuthi sicine sithengisela emgwaqweni kulobunzima esihlangana labo kakhulu ngoba omakhokhoba bayabe besihlezi ibhobho nanku lamapholisa asihlezi ibhobho ngenxa yecovid sesithengisa sibaleka okudala ukuthi sicine silahla ezinye impahla.”
Umnunzana Mike Ndiweni ongumqondisi weBulawayo Vendors and Traders Association uthi ikhansili isiqale ukunikeza abantu incwadi zamalicense okuthengisa.
“Sizwile ukuthi sokuvuliwe ukuthi abathengisayo bahambe baye apply ama license okuthengisa, kodwa esikuzwileyo yikuthi kwenziwa ngamasides akuhambi wonke umuntu. Khathesi sisadingisisa ukuthi kuhamba abakuliphi icele ngokunjalo ngokunjalo.”
Unkosikazi Madade Ndlovu olilunga le Bulawayo Vendors and Traders Association uvumelana loNdiweni.
“SiIokujabula ngoba ikhansili isiqalisile ukuthi inike ama vendors 4ama licenses ende nxa sesilama licenses kutsho ukuthi sesilemvumo yokuthi sithengise esikufunayo singela kwesaba ukuthi siyabanjwa ngamapholisa. Ikhansili seqalisile uhamba ngama wards ukuthi alungisele abantu ama vending licenses kuyangokuthi ufuna ilicense yani.”
Ukhansila kaWard 1 koBulawayo umnumzana Mlandu Ncube wazise ukuba ikhansili yenza iphutha yaphuza ukulungisa indawo yabantu abaphila ngokuthengisa.
“Indaba yabantu laba abathengisayo sithanda ukuvuma lapha esenza iphutha njengo manisplala saphuza ukuba sibalungisele indawo zabo after iCovid. Lokhu kwabangelwa yikuswelakala kwezimali so ngakho basebephenduka kuzakhiwo zabo ezindala ezenza kubenzima ukuthi sisebenze njengokucleaner njalo siyakwazi ukuthi bengaqala ukuthengisa kuyangcola izibi sezinengi ukudlula abathengisayo. Lingakhangelisisa kuhlelo lwethu lokusetshenziswa kwezimali esiluphawule ngeviki ephelileyo sibekile imali eceleni yokwakha izakhiwo zalaba abathengisayo lemali yokungezelela izisebenzi.”
Umsekeli wesikhulumeli sekhansili unkosikazi Bongiwe Ngwenya wenqabe ukuphendula imbuzo yeStudio 7 ethi basadingisisa kulabo abakhangele ngokuqhutshwa kwenhlelo zabathengisayo ukuthi ikhansili isihambe yafika ngaphi emzameni yokuphathisa. Ngesikhathi sisiya emoyeni imbuzo le ibingakaphendulwa.
Kungxoxiswano eyenziwa yiStudio 7 lomphathintambo ongakhangele amabhizimusi amancane, uNkosikazi Sithembiso Nyoni, ngaphambilini, uveze ukuba imali le ibanjwa lugatsha olubona ngezisebenzi lenhlalakahle kazulu ethi njalo njengokuzwa kwakhe abogatsha lolu sebeqalile ukunikeza lolu ncedo kwabanye.
