Inhlanganiso ezimela abathengisa emigwaqweni labasebenza bezimele zithi inyathelo likahulumende lokufuna ukufuqela abaphila ngemisebenzi le phandle kwedolobha izaphazamisa impilo zabo ikakhulu abantu abaphila lobugoga abaziphilisa ngokuthengisa njengabanye.
Umqondisi wenhlanganiso emela abagogekileyo eye Centre for Disability and Development, umnumzana Masimba Kuchera uthi leli nyathelo lathathwa ngesiphangiphangi kungela kukhulumisana okuzwayo njalo kungananzwanga impilo yabantu abaphila lobugoga.
Umqondisi wenhlanganiso ye Zimbabwe Informal Sector Organisation-ZISO, umnumzana Promise Mkhwananzi uthi inhlanganiso ezimela abaphila ngokuzenzela azivumelani lakancani lenyathelo likahulumende njalo zithumezele incwadi kuhulumende lamhlanje zicela umhlangano laye ozangenwa yinhlanganiso ezizimeleyo, abaphila ngokuthengisa emigwaqweni kunye labosomabhizimusi ukuba baphume lendlela eyamukelekayo.
Uthi kulabantu abagogekileyo abanengi abatholakala phakathi kwambaphila ngokuthengisa kungasintando yabo kodwa bezama ukuphila kumumo wezomnotho osumubi.
Umasipala weHarare uthi abantu laba bazasiwa endaweni ezifana leseduzane le Showgrounds kunye lomgwaqo oqonda eChitungwiza ezingaphandle kwedolobho kodwa uKuchera uthi lezondawo azincedi ngalutho ngoba zizabuyisela muva inzuzo yabantu laba.
UMkhwananzi uthi omasipala bayazwisisa sibili njalo bekhulumelana labo noma kuleziqoqodo phakathi kwabanye omasipala ethi uhulumende nguye asebefuna ukuqedelana laye kuloludaba.
Uhulumende uthi kumele kuthi sokufika oLwesihlanu yonale iviki uyabe engasafuni ukubona loyedwa umuntu ezula zula ezitaladeni zamadolobha ethengisa okungelamvumo.