Abaphila lobugoga bakhala ngokungazinikeli kukahulumende ukulungisisa indingeko zabo ngokugcweleyo lokuvala izikhexe ezikumthetho we Disability Act.
Lokhu kuvezwe ngabaphila lobugoga emhlanganweni owenzelwe eState Lottery Hall, eHarare, okade ulenjongo yokubonisana ngokungangeniswa emthethweni olawula ngalabo abaphila lobugoga okumele uhambelane lesisekelo sombuso welizwe.
Iziphathamandla ezivele kungatsha zikahulumende ezehlukeneyo zithi limihlangano yindlela yokuzwa abaphila lobugoga labafisa ukuba kungene ku Bill ekusibanga sokulungiswa, eye Persons Living with Disability.
Omunye wabekade bekulomhlangano nguMnumzana Bruce Nyoni ongumkhokheli wenhlanganiso ye Albino Trust of Zimbabwe.
UNyoni uthe akukho okubi ngokuqhuba imihlangano yaloluhlobo, inkinga isekuthini kuzolandelwa na lokho okuyabe kuphume kiwo.
Umqondisi we Disability Women Support Organisation, uNkosikazi Rejoice Timire, uthe ufisa silungisiswe isimo somthetho obona ngezamalungelo abaphila lobugoga.
Bakhale ngohulumende ongaziqakathekisi inswelo zabo.
Umhlangano wangoMvulo wenziwe ngemva kwaleyo eqhutshwe eMasvingo le Mutare njalo ungenwe yiziphathamandla zengatsha ezehlukeneyo zikahulumende ezigoqela olwezemithetho, olwenhlalakahle kazulu lezinye.
NgolweSithathu kuyonale iviki wenziwa eMarondera umhlangano onje kwathi-ke ngolweSihlanu uzokwenzelwa eChinhoyi.
Ikhangelelwe ukwenziwa njalo imihlangano enje eBindura, Gwanda, Lupane lakoBulawayo, ngenyanga ezayo ka Lwezi.
