Bayakhala eZimbabwe ngokubotshwa mahlayana kwabaphikisayo labalwela ilungelo loluntu abathi uhulumende ubathwalise nzima ngesikhathi kulungiselelwa umhlangano omkhulu oweSouthern African Development (SADC) Summit ozaqhutshwa ngoMgqibelo.
Kulabantu abavalelwe e-remand prison abedlula ikhulu lamatshumi ayisithupha abacatshangelwa ukuba babefuna ukuphazamisa umhlangano lo ngokutshengisela emigwaqweni besola indlela okwaqhutshwa ngayo ukhetho nyakenye lokunye okuhlupha uzulu.
Olwela ilungelo likazulu, uMmnu. Briggs Bomba, laye uthi uphose wathunjwa ngabacatshangelwa ukuba badlelana lohulumende kaMongameli Emmerson Mnangagwa, obekhuluma namuhla emphakathini ekolitshini leUniversity of Zimbabwe kupublic lecture esethula okumayelane leSADC.
Kunengi okwenzakala eZimbabwe ngoLwesine lango Lwesihlanu okuhambelana leSADC Summit.
Eyinye inkokheli yeSADC, egoqela uMongameli Samia Suluhu Hassan wakwele Tanzania, uMongameli Francis Chakwera wakwele Malawi lomkhokheli kahulumende wakwele Lesotho uMnu. Samuel Ntsokoane Matekane sebefikile eZimbabwe.
Akwaziwa ukuba uMongameli Hakainde Hichilema wakwele Zambia uzahamba eZimbabwe kumbe hatshi. Kulemibiko ethi kadlelani kahle lohulumende kaMnangagwa.
Forum