Inengi labantu abasemhlubulweni weMandebeleni bathi abalalwazi lwempahla evikela amakhala, umlomo lezandla, amamask lamagloves, okuchasiswa zingcwethi zezempilakahle ukuba kusetshenziswe ukuzivikela ukuthelelwa igcikwane leCOVID-19 lona eselithethe imiphefumulo yabantu abanengi emhlabeni jikelele.
UDokotela Rudo Gumbo uchasisela uzulu ngokusebenza kwamagloves lamamask lawa.
''Kulabahamba begqoka amagloves ngicela lingahambi liwagqoke indawo yonke okuqakathekileyo yikugeza izandla sikhathi sonke. Uma ufuna ukuhamba uwagqokile kutsho ukuthi ungabamba ulutho kumele uwantshintshe uwalahle hatshi ukuwaqgoka kusukela ekuseni kuze kubentambama ngoba uyabe usufana lokuthi usumemethekisa ugcwalisa igcikwane uligcoba indawo yonke.''
Umqondisi weZimbabwe SexualRight Center, uMnu Mojalifa Moloele Ndlovu ugcizelela okutshiyo nguDr Gumbo.
''Ngilokwesaba ngendlela amagloves asetshenzisa ngayo kodwa wona adalelwe ukuvikela umuntu ekubambeni ingcekeza kumbe umkhuhlane sivame ukuwabona esebenza ezibhedlela, ezingadini kodwa kulokhe kuqale udubo lweCovid 19 abantu sebewagqoka mahlayana bazibambe ubuso, yonke indawo njalo bebingelela labantu. Abantu sibakhuthaza ukugeza izandla ngesepa langamanzi hatshi ukuhamba begqoke amagloves lama mask ngoba balakho ukumemethekisa umkhuhlane bengananzelele.''
llunga ledale lephalamende koBulawayo ePumula uNkosazana Sichelesile Mahlangu uthi esigabeni sakhe umkhuhlane awukabikhona kodwa uzulu uphilanzima.
''Umkhuhlane weCOVID 19 awukabikhona esigabeni sami kodwa labo esibona ingathi baphathekile siyabasa esibhedlela kodwa baphenduka bengabanjwanga umkhuhlane. Udubo olukhona yikuthi abantu bayaswela njalo balambile uhulumende akala sizo asethe wabapha lona. Abantu sebesazi ngalo umkhuhlane njalo bahleli emakhaya,''
Kusenjalo lamhlanje isibhedlela seMpilo Central Hospital sithole isipho esivele kunkampani yeEconet. Umqondisi womsebenzi kulesi sibhedlela, uDokotela Solwayo Ngwenya uchasisa ngesipho lesi.
''Lamhlanje sithole isipho samasink amane asuka eEconet ukuze abantu bethi begeza izandla uma bengena esibhedlela ngemizamo yokuvikela umkhuhlane weCOVID-19. Siyasibonga lesisipho ngoba size ngesikhathi siphakathi kokulwisana lalo umkhuhlane njalo sidinga lokuncediswa njengesibhedlela.''
Okwamanje, inhlanganiso yezempilakahle emhlabeni jikelele eyeWorld Health Organisation ithi akukabi lomuthi wokwelapha iCOVID-19, abantu bamele baqakathekise ukulondoloza ukuhlanzeka lokuzivikela.