Ingcwethi kwezombusazwe zithi umsekeli kamongameli uMnu. Constantino Chiwenga ulakho ukungena esikhundleni sika Mongameli Emmerson Mnangagwa engasuka embusweni.
Kodwa abakubandla leZanu PF kabaphumeli egcekeni ngomuntu abazamfaka esikhundleni lesi kungakafiki ukhetho lukamongameli ngomnyaka ka2028.
UMnangagwa ubikele uzulu ngoLwesine ukuthi usefuna ukuyaphumula ngakho-ke amalunga ebandla elibusayo sokumele elungiselele ukukhetha ozancintisa kukhetho oluzaqhutshwa ngomnyaka ka2028.
Ingcwethi kwezombusazwe, uMnu. Effie Dlela Ncube, uthi kusobala ukuba uChiwenga uzangena esikhundleni sika Mnangagwa.
Zinengi ingcwethi zombusazwe ezilombono onjengoka Ncube loba ezinye zisithi ozathatha isikhundla lesi ngumuntu odlelana loMnangagwa.
Abakubandla leZanu PF bathi okwamanje wonke umuntu olilunga lebandla leli ulakho ukungena esikhundleni lesi. UMnu. Believe Gaule uyakusekela lokhu.
Omele iPelandaba/Mpopoma edale lephalamende, uMnu. Joseph Tshuma, uthi laye uyasifuna isikhundla lesi.
UMnangagwa wangena esikhundleni sikamongameli kulandela ukugenqulwa libutho kowayengumongameli umuyi Robert Mugabe. Wakhethwa kabile emhlanganweni yeCongresss ukuba ngumkhokheli webandla elibusayo.
Forum