Abafundi besikolo seNhwali Primary School sebefundela egcekeni ngenxa yokusilela kwezindlu zokufundela.
Abazali abalabantwana abafunda esikolo lesi bacela uncedo lokwakhe ezinye izindlu zokufundela.
Abafundi kulesisikolo bafunda befulathelene endlini yokufundela eyodwa. Ngesikhathi umumo womkhathi ungenzi kahle, abanye bafundele phandle.
Akumangalisi ukuthola abafundi abafika amatshumi ayisitshiyagalombili - 80 lababalisi ababili endlini eyodwa yokufundela esikolo seNhwali Primary School.
UNkosikazi Kelebogile Ndlovu oyisakhamuzi seNhwali uthi isimo kulesisikolo sizwisa usizi ngoba abafundi beminyene kakhulu .
“Abantwana bakhona bafunda beminyene, iclass ngayinye uthole ukuthi ilabantwana abakwana amaclass amabili , kuclass abantwantwana bafunda befulathelene, eyinye iclass ikhangele le eyinye ikhangele le abakufundayo abanye bacina bengakuzwisis lokudlala kusuka kube kunengi njalo kuluhlupho ebantwaneni ngoba oyedwa engahlaselwa ngumkhuhlane bayathelelana.”
Umgcinisihlalo wekhomithi yabazali besikolo seNhwali, uMnu. Obert Ndlovu, uthi isimo salesisikolo sizadala ukuthi abafundi bengaphumeleli ezifundweni zabo.
“Uthole kweyinye indawo bengu 87 abantwana beminyene , isimo esikuso siphazamisa abantwana ezifundweni okokuthi lempumela ayisoze yabanhle njengoba abanye bayabe befulathelene ababalisi befundisa ngasikhathi sinye okudala ukuthi bengasakwazi ukuthi balalele uphi okucina kuphazamisa lempumela yabo.”
UNdlovu uthi okwamanje badinga uncedo lokwakha ezinye izindlu zokufundela.
“Nga siyathola uncedo kwabafisa ukuncedisa ukuze siyakhe izindlu zokufundela ezimbili loba ezintathu ngoba lokhu kusibulalela abantwana,ikusasa yeSizwe isebantwaneni, ukufundisa abantwana yikwendlalela ikusasa labo.”
UKhansila kaWard 24 eGwanda South, uMnu. Ntokozo Ndabalime, uthi abogatsha lwezemfundo bake bavakatshela kulesisikolo bezobheka isimo.
“Abe Educaton bake bafika esikolo seNhwali bezohlola ukuthi abantwana bafunda njani bathola beminyene kulamaclass angu4 afundela phandle bafaka umbone yokuthi abancane abe ECD bafundele phakathi kuthi abakhulu sebengabona ukuthi kungenziwa njani.”
UNkosikazi Thando Mauba ongumsekeli kanobhala wenhlanganiso yababalisi eyeEducators Union of Zimbabwe uthi zinengi izikolo ezibhekane lodubo lweNhwali esabelweni seZansi yeMaNdebeleni.
Isikhulumeli sogatsha lwezemfundo uMnu.Taungana Ndoro uthi bakhangelele ukwakha izindlu zokufundela ezingamakhulu amahlanu kusiyaphela umnyaka ozayo ikakhulu emaphandleni. Uthi njalo izikolo ezilabafundi abanengi zilakho ukufundisa abanye ekuseni kuthi abanye bangene emini laloba evuma ukuthi lokhu kungabanzima emaphandleni lapho abafundi abahambi imango emide besiya esikolo.
Abafisa ukuncedisa isikolo seNhwali balakho ukuxhumana lomgcinisihlalo wekomidi yabazali uMnu Ndlovu kunobholo ezithi +263712731224.
Kusenjalo, zidlela evalweni izakhamizi zeBuvuma eGwanda South kulandela ukudutshulwa kosomabhizimusi uMnu. Unkemetsi Maphosa oleminyaka yokuzalwa engamatshumi amabili lasikhombisa ngeSonto ebusuku esitolo sakhe.
Isikhulumeli samapholisa eGwanda South uNkosikazi Loveness Mangena uthi uMaphosa wadutshulwa kahlanu emzimbeni wabhubhela eUBH koBulawayo ngoMvulo.
Ukhuthaza uzulu ukuthi asebenzelane lamapholisa ukubamba lezizigelekeqe ezeingaziwayo.
Forum