Abantu abanengi Lokhe beqhubekela phambili betshengisela ngokungayi emsebenzi edolobheni leGwanda njalo uzulu seveze imbono etshiyeneyo ngalokhu okumele kwenziwe.
Loba nje ezinye izitolo bezivuliwe ngoLwesine, amabhanga, amagalaji amafutha ezimota kanye lezikolo kuqhubekele phambili kuvaliwe kuthi ezibhedlela balutshwane abongi abakade beselapha izigulane.
Ukuvalwa kwamavinkili lezitolo sekudale ukusilela kokudla okusetshenziswa ngabantu nsuku zonke okunjengempuphu, isinkwa lokunye osekutshiye inengi libhekane lendlala.
Inengi elixoxe leStudio 7 liveze imibono etshiyeneyo ngalokhu osekumele kwenziwe ukuze ilizwe liqhubekele phambili.
UMnu. Thulani Mzingwane uthi intengo yamafutha ezimota yona eqonge ngokuphindwe kabili kuzamele iyehliswe kumbe uMongameli Emmerson Mnangagwa atshiye isihlalo.
“So, nxa izinto sezikhwelile okungangokuthi amabasic commodities engasathengeki umuntu ehola imali encane njengabahlali beZimbabwe singama Zimbabweans by birth sikhangelele ukuthi upresident eyehluleke ukuthi adeliver njengokufanele asenzele khona sicabanga ukuthi kayehle esihlalweni kumbe kuyehle izinto nxa kungenjalo sizathatha amanyathelo esizawabiza ngokuthi yifinal push sitshintshe umbuso wabancindezeli esihlala phezulu kwayo.”
Inengi kulesisabelo liphila ngokwemba igolide njalo ukuvalwa kwamagalaji amafutha ezimota lokhu sekuphazamise ukwenjiwa kwalo okulakho ukuphazamisa umnotho welizwe, kutsho umqoqi wenhlelo zebandla leZapu eZansi yeMaNdebeleni, uMnu. Austin Sibanda.
“Awungeke ukhweze ifuel evele isehlula lakhathesi ukuthi itholakale, evele isehlula khathesi ukuthi abantu bayithenge ngoba kungela industrial site bephila nzima. Kuleli elakithi eMaNdebeleni siphila ngokutsheketsha, ukutsheketsha kwakhona sekunzima, pho sithenge ngani ifuel … Sithenge ngani ukudla khona sekukhwele kangaka hayi-bo iZanu kayiphume iyehlulekile 40 years iyehlulekile kayiphume.”
UMnu Ndaniso Mpande uthi kuyadingeka ukuthi uhulumende lo akhangelisiwe intengo yempahla ezitolo.
Osakhulayo uKukhanyakwenkosi Mnkandla uthi ufisa ukutshengisela lokhu kuqhubekele phambili kuze kube lenguquko elizweni.
“Ngifisa kuqhubekele phambili ukuthi izinto lezi zize zilunge hayikhona okwe 3 days lokhu akube yinyanga yonke baze babekwazi oMnangagwa ukuthi kasibafuni thina asisakufuni lokhu okwenzakalayo ilizwe litshintshe kube kahle”.
Abanye bathi kuyadingeka ukuthi uMnangagwa ahlale phansi akhulumisani lomkhokheli webandla eliphikisayo eleMDC, uMnu. Nelson Chamisa, kubunjwe uhulumende womanyano ukuze indubo ezibhekane lelizwe ziphele.
Esibhedlela esikhulu seGwanda imota ethwala izigulane i-ambulance iyehlulekile ukuhambisa abagula kakhulu koBulawayo ngoba ingela mafutha ezimota.
Amapholisa aqhubekela phambili elinde amagalaji njalo agcwele idolobho lonke.
Loba nje kuthulisile kulumhlubulu ukhona obotshiweyo uMnu. Nkanyiso Ncube esetheswa umlandu wokutshengisela ngemva kokuba etholakale elumathisa amathaya emote ngomlilo.
