Uzulu weZimbabwe uveza imibono ehlukeneyo ngenyathela elithethwe ngobengunobhala jikelele webanlda leMthwakazi Republic Party- uMnu Ackim Mhlanga osetshiye leli bandla esiya kuba lilunga lebandla elibusayo eleZanu-PF.
Abantu basele bebambe owangaphansi ngemva kokuba kusabalale umfanekiso wevideo enkundleni zokuxhumana, lapho uMhlanga ezikhulumela ngowakhe umlomo esazisa ukuba usesehla esikhundleni sokuba ngunobhala weMRP esephindela lapho avela khona kuZanu PF.
Olwela amalungelo oluntu uNkosikazi Cora Ndebele uthi inyathela likaGasela libayangisile.
"Into eyenziwe ngoGasela esiya kuZanu thina isiyangse kakhulu njengabantu abalwela uMthwakazi lobanje kulilungelo lakhe kodwa siyazibuza ukuthi ubeqotho na kumbe bangaki oGasela abasele kuMRP labakumabandla aphikisayo. Loba kusiba lokuxabana emabandleni asizakwazi ukuthi kulabaoGasela abanjani kusiyangisile kodwa yiyo idemocracy yakhona leyo."
Isakhamuzi sakoBulawayo, uMnu Thomas Moyo uthi indaba kaGasela iyahlupha kakhulu.
"Indaba le iyahlupha ikakhulu kimi ukuthi kulomuntu ongasuka kuMthwakazi esiyakuzanu kunzima ngokubona kwami iMthwakazi kumele ivule amehlo ngabantu abasebenza labo kodwa ngibona sengathi lundoda ebekuMthwakazi kodwa esebenzela iZanu."
Ophatheka kwezombusazwe ehlala eSouth Africa uMnu Mzaca Ngulube usola kakhulu inyathela likaMhlanga.
"Into eyenziwe ngAckim Mhlanga esuka kubandla leMRP esiya kubandla elibusayo leZANU akukhombisi ukuthi ulobukhokheli. Sekusobala ukuthi ibandla leZanu PF selehlise izinga labo lobukhokheli bacabanga ngezisu bengacabangi ngengqondo lokuthi inkokheli ezinengi zigijimisa iphango kulokumela abantu. Kubasegcekeni kuyenyanyisa kulihlazo alenzileyo ukuthi asuke kuMRP esiya kuZanu kuyinhlamba enkulu ngokwazi ukuthi iMRP imelani kubantu bakithi kutshengisa izinga lokuthi abantu bakithi sebelambe kakhulu."
UMnu Ackim Mhlanga uchaze ukuba kulilungelo lakhe alithetheyo ngoba ebona ezasebenza kuhle kungela kulwa.
"Ngibone kulilungelo lami ukuthi ngitshiye iMRP ngiyekubandla engingalikhetha ngisebenza layo kungela kulwa kulokuthula. Abantu bonke balemibono yabo omunye lomunye ulombono wakhe ekuthatheni isinqumo ngakho labo abasola leli nyathela balombono wabo engingawuboniyo. Angilamfihlo elilayo angilamfihlo engingayithengisa."
Asuye yedwa obe lomcabango wokuhlubuka kulelo bandla besiya kuZANU-PF. Laba bagoqela uMnu Nkosikhona Sibanda obengu mabhalane wezemidlalo lamanye amalunga aweHwange District.
Ibandla elibusayo leZanu-PF kulezi insuku lile Njabulo enkulu ngoba lisamukela abantu abanengi abasuka kumabandla aphikisayo bezokuba ngamalunga ebandla elibusayo ngesikhathi sokulungiselelwa ukhetho oluzayo luka2023. Omunye wabo kunguNkosazana Lilian Timvios obeyisiphathamandla sedale laphezulu eleMDC Alliance, owake waba lilunga ledale lephalamende ekuMDC uMnu Blessing Chebundo labanye, ngoNhlolanja lonyaka.