Ukukhothama kwenduna uMarupi sekutshiye izakhamizi zeDibilashaba zimadolonzima.
Izihlobo labaphansi kwesigaba senduna etshonileyo bathi kumele luhlolisiswe kabanzi udaba lolu.
Bekulokufuthelana edale ebelihlezi emzini wakoMarupi ngoLwesithathu eleziphathamandla zikahulumende lemuli yakoMarupi kuxoxiswana lomgcinisihlalo weGwanda Rural District Council, uMnu Mphathiswa Ncube, owetheswa umlandu wokuqoqa ukwelatshwa kwenduna eHarare engavumelananga lemuli. Ngalokhu, abakoMarupi bathi badidekile ngendlela induna edlule ngayo emhlabeni.
Uyisekazi wenduna etshonileyo, uNkosikazi Angeline Moyo, uthi basele belembuzo edinga impendulo ngokubhubha komntanabo obekhathazwa likhanda kodwa obhubhe sekhupha njalo eginjiswa yisisu.
"Umufi ukuhamba kwakhe akungijabulisanga ngoba usuke lapha ngingambonanga ukuthi usuke njani, kutheni. Uthe esiya eHarare ubevele ngumuntu ohlutshwa likhanda kodwa ikhanda lakhe beselingcono kodwa sesisizwa khonale eHarare sekuthiwa ubesehuda ebulawa yisisu ehlanza ukuthi kuhambe njani asikwazi. "
Kodwa omunye wemuli uMnu. Chris Marupi uthi bazamelela ubufakazi bukadokotela ukuze babelesiqiniseko salokhu okuthethe induna.
"Sisamelele ipost mortem yiyo ezasitshela konke lokhu, siyakwazi ukuthi umuntu engabhubha kuba lenkulumo ezinengi lemicabango and eminengi etshiyeneyo."
Amapholisa athi ahlolisisa ukubhubha kwenduna uMarupi osanda kutshontshelwa imota entsha ayiphiwe nguhulumende, omakhalekhukhwini lemali. Abamtshontshela lokhu babehlome bephelele ngemibhobho emkhulu lemncane njalo bambopha imbila zikakonde banyamalala. Abakabotshwa abantu laba. Uyise omncane uMnu. Molisa Nare uthi lesisiga sihlukuluze induna egqondweni okungaba kudale ukubhubha kwakhe.
"Sicabangela ukuthi khonokho kungaba ngokunye okumhlukuzileyo kakhulu ngoba ebephathekile waphinda futhi lezistress zonalezi ukuthi imota sihambile."
Osaphethe ubuduna bakoNhlamba eNtepe, uMnu. Jeffrey Ndlovu, uthi kuyadanisa ukuthi uMarupi udlule emhlabeni engosakhulayo.
"Siphakathi kosizi ngokutshiywa ngomunye wethu uChief Marupi, yikho okusihlukuluze kakhulu empilweni zethu, ubengosakhulayo engasoNduna endala, okokuthi ebengumuntu ofundiseksyo."
Othengisa ezitolo zakoMbuzimbili, lapho induna ebivame ukuchitha khona isikhathi lezakhamizi, uNkosazana Brenda Maphosa, uthi kumethusile ukukhothama kukaMarupi.
"Ubengasomuntu womsindo , besikwejisa kuhle nxa sehamba avalelise, Maphosa sengihamba usale kuhle sizabonana kusasa,mina ekuguleni kwakhe ngimbone ngamalanga okucina lakho ngimbona ezogada wabuya wathenga idrink esiya eGwanda kusukela khonapho angisambonanga ngezwa kuthiwa uChief kasekho, kungethusile ngoba bengingacabangeli ukuthi ngumuntu ongasitshiya."
UMarupi, owagcotshwa ukuba yinduna ngomnyaka ka2012, utshiye umkakhe njalo uzafihlwa emathuneni angakibo.
Forum