Sokuxokozela eZimbabwe kulandela okwethulwe ngumkhokheli webutho uLieutenant General Anselem Nhamo Sanyatwe othi ibandla leZanu PF lizabusa amadonki aze amile impondo.
USanyatwe, owethule lokhu ngesikhathi ekhuluma emhlanganweni wezakhamizi eManicaland, uthe ibutho lizakwenza konke elikwenelisayo ukuze iZanu PF ibuse kuze kubephakade.
Utshele izakhamizi ukuba ibutho lizabamba ngamandla abantu ukuthi bevotele ibandla leli.
USanyatwe wayekhokhela iviyo lebutho elabulala abantu abayisithupha ngomnyaka ka2018 kulandela ukhetho olukhulu eZimbabwe.
Uphenyo olwenziwa yikhomishini eyayikhokhelwa ngowayengumongameli wakwele South Africa, uMnu. Kgalema Motlanthe, lwaveza ukuba abantu ababulawa mahlayana libutho babetshengisela ngokuthula kuthi njalo abanye babezihambela eHarare.
Ibutho lisakhokhelwa nguGeneral Vitalis Zvinavashe lake lathi ilizwe kalisoze likhokhelwe ngumuntu ongalwelanga inkululeko yeZimbabwe.
Ukuze sihlaziye udaba lolu, sixoxe loMnu. Believe Gaule okubandla leZanu PF othi uSanyatwe ubekhuluma akusifayo loba engavunyelwa yisisekelo sombuso welizwe ukuba ethule amazwi la.
Siphinde saxoxa ngodaba lolu loMnu. Effie Dlela Ncube, ingcwethi kwezombusazwe okunhlanganiso yeNational Consumer Rights Association, uthi uSanyatwe wephule isisekelo sombuso welizwe.
Forum