Inhlanganiso ephathisa amazwe womhlaba ngokudla emhlabeni jikelele, eyeWorld Food Programme, ibika ukuthi lonyaka abantu abedlula izigidi eziyiskhombisa kweleZimbabwe bakhangelane loludubo olukhulu lwendlala ebangwelwa yikuguquka kwesimo somkhathi okubangele ukungani kuhle kwezulu.
UMnumzana Kudakwashe Munsanka owenhlanganiso eye Youth in Agriculture Apex Council, ekhangela indaba ezabalimi abasakhulayo, uthi okutshiwo yinhlanganiso yeWorld Food Program kuliqiniso.
“Into azimanga kuhle emasimini lapha. Indlala ikhona sibili elizweni lonyaka. Lokhu kusizwisa ubuhlungu kakhulu ukubana ilizwe elikade liyi break basket ye Africa yindaba sebekhala kangaka ngendlala elizweni,” kutsho uMunsanka.
Ebuzwa ngokwehla kwesilinganiso somumbu olinywayo elizweni, uMunsanka uchasise izizatho ezimbalwa ezibangela ukuthi lokhu kucine kusenzakala, okugoqela ukuguquka kwesimo somkhathi, ukuqonga kwentengo yemvundiso yama fertilizer lenhlanyelo, kanye lomkhuba omubi wenkhohlakalo owenzakalayo kuhlelo lukahulumende lokulima olweCommand Agriculture.
“Udaba lolu luyahlupha sibili. Uyazi ukubana si-solve uhlupho lolu kumele sikhangele inhloko yakhona sibili, siyitshaye ekhanda lapho okumele sibili siyitshaye. Ayisiyo kuphela inhlanyelo kuphela, uhlelo lweLand Reform Program, kulabantu abaphiwe amasimu akulalutho abakwenzayo. ” kutsho uMunsanka.
UMunsanka uqhubekele phambili ekhuthaza uhulumende ukuthi baqhakathekise abatsha kwezokulima ngenxa yokuthi yibo abasaselamandla njalo ulwazi oluthile olungasetshenziswa ukuthuthukisa ilizwe.
Inhlanganiso ye World Food Programme ithi kulumnyaka kudingakala usizo kweleZimbabwe, oludabuka kwamanye amazwe, olubiza imali yona edlula ezigidi ezilikhulu zamadolla eMelika, $100 000 000, ukuze udubo lolu lulungisiswe.
