Abantu abanengi bathe gwaqa ngoMgqibelo enkundleni yeNational Sports Stadium eHarare lapho abavalelise khona umuyi uOliver Mtukudzi, obengumculi olodumo.
Umongameli webandla eliphikisayo leMovement for Democratic Change, uMnu. Nelson Chamisa, lomhlabeleli olodumo uWinky D, osanda kwethula idlalade elichothoza uhulumende kaMongameli Emmerson Mnangagwa, bavinjelwe phandle kweNational Sports Stadium ngabezomvikela.
Isikhulumeli sebandla leli, uMnu. Jacob Mafume, uthe uChamisa utshelwe ngabezomvikela ukuthi akumelanga angene enkundleni yemidlalo lapho obekuqoqwe khona umcimbi wokuvalelisa uMtukudzi kulabaculi abanengi akade behlabela.
Asenelisanga ukukhuluma lesikhulumeli sikamongameli, uMnu. George Charamba, ngokuvinjwa kuka Chamisa loWinky D.
Loba kunjalo, abantu bebegida bethakazelela imisebenzi kaMtukudzi obhubhe eseleminyaka engamatshumi ayisithupha lasithupha njalo obelamadlalade angamatshumi ayisithupha lasikhombisa.
Omunye wabantu abathakazelele imisebenzi kaMtukudzi nguMnu. Felix Matsika othi wayedlelana kahle lomuyi.
“UOliver ngimaze sikhula sonke ehlala eHighfield mina ngihlala eMbare ngasengisuka ngayahlala koBulawayo. Ngimaze engakabi ngumuntu wamakatali. Kodwa uthe eseqalise ukutshaya amakatali besengingu muntu ohlala koBulawayo. So, ngilahlekelwe kakhulu njengami njengoba lizwile imbali yakhona ukuthi wayengumngane wami. Abantwabami bebemazi engudaddy. Nxa sesilobolisa abantwana besibizana, ngibuye ngizelobolisa owakhe laye ngimbize nxa sengilobolisa owami.”
UMnu. Vusa Moyo, obengumanginela nxa kuphekwa umculo, uthi usebenze kahle loMtukudzi. “Ubengumdala osebenza kahle labantu. Bekungahluphi nxa sokubuya ezokubhadalana imali. Ngikuthatha ngokuthi sizebenze kahle njalo ngizizwa ngihlonipheka ngenxa yalokho.”
Lokhu kugcizelelwe nguMnu. Ntando Dube othi uMtukudzi ubebambanisa abantu emhlabeni wonke jikelele.
Kukhangelelwe ukuthi uMtukudzi uzangcwatshwa ngeSonto eMadziva esabelweni seMashonaland Central lapho okuzabe kuleziphathamandla zikahulumende njengoba enikwe isicoco sokuba liqhawe lesizwe.
Umdeni wakhe walile ukuthi angcwatshwe lamanye amaqhawe eNational Heroes Acre eHarare.
