Amalunga enhlanganiso ezilwela ilungelo loluntu, angamakhulu phose amathathu afole ayenikeza incwadi yezikhalazo kummeli wakwele South Africa eZimbabwe, phezu kodlakela oluqondiswe kuzizalwane zakwamanye amazwe awekazi le Africa, okubalisa ezakwele Zimbabwe.
Yingoma ye Africa ebihlatshelwa ngamalunga alezinhlanganiso, abephethe amabhakana abelemibiko ehlukeneyo isola okwenzakala kwele South Africa, etshengisa ukudana phezu kwalezizehlakalo, ngesikhathi enikeza incwadi yezikhalazo emahofsini ommeli wakwele South Africa eZimbabwe.
Yamukelwe ngumsekeli wommeli wele South Africa unkosazana Phumla Andy Makhwabe, obonge ukuba khona kuka Mayor we Harare umnumzana Bernard Manyenyeni ukuphelekezela la malunga, wathembisa ukuyidlulisela phambili kuhulumende wakhe ukuba ahlaziye okumunyethwe yiyo.
Lanxa amapholisa ohlangothi lweRiot abekhona ngesikhathi omunye walezi nkokheli umnumzana Regis Muthuthu eyifunda lingcwadi, akekho obotshiweyo loba ukuhlukuluzwa.
Umqondisi wenhlanganiso ye Combined Harare Residents Association (CHRA ), umnumzana Mfundo Mlilo, ungomunye wabamanyane labanye ukuyakwethula lincwadi.
Kodwa lokhu kukhalaza uMlilo uthi kakusoze kuphelele ekuqondisweni kuhulumende wakwele South Africa kuphela kodwa lakuhulumende kamongameli Robert Mugabe athi kungumlandu wakhe ukulondoloza izizalwane zakuleli ngokuzitholisa okudingakalayo ukuze zithole inhlalakahle eziyidinga kwamanye amazwe ngoba isimo kwezomnotho singasihle elizweni.
Okuyinto egcizelelwe ngumqondisi wenhlanganiso ye Chitungwiza Resident Trust, umnumzana Marvelous Khumalo, oveze ukuba okwenzakala kuzizalwane zakwamanye amazwe awezwekazi leAfrica okubalisa eleZimbabwe, kungabaphathi kuhle.
UKhumalo uthi okunye njalo okubafuqileyo njenge CHITRUST ludaba lokuba inengi lalabo abachapha besiyaphatha imisebenzi yokuziphilisa kulelolizwe kuyizakhamizi zeChitungwiza.
UKhumalo uthi lokho okwenzakalayo kulakho ukuphazamisa ubudlelwano phakathi kwele South Africa lamanye amazwe ngakho kumele kuthathelwe amanyathelo ngokuphangisa.
Lanxa amapholisa eke abalela ukuyakwethula lincwadi yezikhalazo kummeli wakwele South Africa, ethi akalabo abantu abangaphatha lumsebenzi, isimanga yikuthi bebekhona kula mahofisi lanxa bengazange bahlukuluza labo abekade bekulombuthano.
Lincwadi ikhumbuza uhulumende wakwele South Africa ukuba kungumlandu wakhe ukuba alondoloze amalungelo omuntu wonke kungakhathalekile ukuba yisizalwane sakwele South Africa loba hatshi njengalokho okutshiwo yisisekelo salelolizwe kanye lezivumelwano angena kizo phezu kobudlelwano labakwamanye amazwe.
Abenhlanganiso ye South Africa Human Rights bona bakhuthazwa ukuba bayihlolisise inkulumo yeNkosi Goodwill Zwelithini, leyendodana ka mongameli welizwe, umnumzana Edward Zuma kanye leka unkosazana Lindiwe Zulu.
Abakade betshengisela laba bacine belubhekise eMedia Centre eHarare lapho okuke kwaba lemizamo yokubalwisa ivelela kuhlekana labontanga beZanu PF abasebenzela endaweni ye Five Avenue, bucwadlana lamahofisi wommeli we South Africa, okuvinjwe ngamapholisa.
Umsindo lamapholisa uqhamuke esehluphane labontanga abakade begqoke izikipa ebezilemibiko ebiphezu kokunyamalala kuka Itai Dzamara.
Lokhu kwenzakale ngesikhathi amalunga enhlanganiso ezilwela ilungelo loluntu lezi zilungiselela ukungena umhlangano lentathelizindaba, owenzelwe eMedia Centre eHarare, phezu kohambo lwabo lokuya emahofisini wommeli we South Africa eZimbabwe.