Inhlanganiso yeFamine Early Warning Systems Network ithi abantu bazaqhubeka bebhekane lendlala ngomnyaka ozayo ngenxa yezulu elingasoze line ngemfanelo.
Ithi uzulu othwele nzima kakhulu ngohlala ezigabeni ezifana leMatabeleland, Masvingo, Midlands leManicaland.
Kodwa inhlanganiso le ithi ezinye imuli seziqalile ukuthola usizo lokudla, okulakho ukwenza umumo ube nganeno kancane.
Uzulu okhulume leStudio 7 laye ukufakazile ukuthi ngempela umangoye uselala eziko emizini eminengi.
"Komile sibili kunje sikhalela ukuthi ngabe izulu selinetha kodwa alikho," kutsho isakhamuzi sakoBhutje, ePlumtree uNkosikazi Thubalami Ndebele.
"Sibhakane lendlala sibili ebuhlungu okunye. Izifuyo lazo seziqalile ukucuba ngikhuluma kunje sivusa imihla lemihla," uqhubeke echasisa.
Amazwi kaMaNdebele agcizelelwe yisakhamuzi sakoHingwe uDebra Ndlovu yena othwe kjweyakhe imuli sebetshona kwezinye insuku bengadlanga.
"Siyalamba kakhulu sibili. Ngiyacela ukuthi mhlawumbe lingasizamela okunye ngoba sitshone ngendlala, asidlanga lutho," kutsho uMandlovu ecela usizo kulumsakazo.
Abahlala emadolobheni labo bathi umomo awumanga kuhle, njengokufakaza kwesakhamuzi sakoBulawayo uMnu Cloud Mhlanga yena uthi lanxa ukudla kukhona ezitolo, uzulu kalayo imali.