Inhlanganiso yamagqwetha eyeZimbabwe Lawyers for Human Rights ithi abalwela ilungelo loluntu abane abakhitshwe izolo ngenkani kundizamtshina ngamapholisa babotshwa njalo batshaywa kabuhlungu betheswa amacala okwephula iziqondiso zomthetho weCriminal Law (Codification) and Reform Act.
Inhlanganiso le ithi uMnu. Robson Chere ongumqondisi weAmalgamated Rural Teachers Union of Zimbabwe, umbalisi uNkosazana Namatai Kwekweza, ukhansila Samuel Gwenzi loVusumuzi Sibanda kuthiwa batshengisela emphakathini ngendlela eyaphazamisa uzulu.
Kucatshangelwa ukuba babengabanye abatshengisela phandle komthethwandaba kamantshi eHarare ngesikhathi kuze kwalelwe uMnu. Jameson Timba labanye abafika phose amatshumi ayisitshiyangalombili ukuba bebhadale isibambiso sebail kulandela ukubotshwa kwabo emzini kaTimba lapho ababethakazelela khona usuku lweDay of the African Child.
Kusenjalo, kulamanye njalo amalunga ebandla eleCCC abangamatshumi phose amane – 38 ababotshwe eKariba abetheswa amacala okwephula imithetho yokubuthana emphakathini.
Konke lokhu kwenzakala abaphikisayo besithi kabasavunyelwa ukuqoqa imihlangano ngesikhathi eleZimbabwe lilungiselela umhlangano omkhulu oweSADC Summit ozaqhutshwa eHarare kumaviki amabili azayo. Boneni abamabandla aphikisayo.
Sixoxe ngodaba lolu loMnu. Nhlanhla Moses Ncube unobhala jikelele wenhlanganiso yeFreedom Alliance othi akumangalisi okwenziwa nguhulumende kaMongameli Emmerson Mnangagwa.
Kodwa uMnu. Kuda Munsaka okubandla leZanu PF uthi bazaphelela entilongweni abafuna ukutshengisela ngesikhathi kulungiselelwa umhlangano omkhulu owekikheli yeSADC.
Forum