Edolobheni leGwanda, imuli zamaqhawe alwela inkululeko yelizwe leZimbabwe, ikakhulu lawo atshonayo, ngoMvulo zibuthene lapho okubekwa khona amaqhawe zikhumbula abazinikela impilo yabo ukukhulula ilizwe.
Izihlobo zamaqhawe ziveze ukujabulela lelilanga laloba zilokukhonona ngendlela uhulumende abaphatha ngayo.
UMnu Tamuka Mangena umntwana weqhawe uMnu. Nephat Mangena uthi lamhlanje bebenanza imisebenzi kayise esithi kungayisuye labanye bakhe ngabe akulakukhululeka elizweni.
“Uhulumende laye akhangele abantwana bama war veterans bengabi zintandane kuzekukhanye ngoba uhulumende nguye osengumama kumele abone ukuthi abantwa bayahamba esikolo, bayadla, bayagqoka bathola lezimota zokuyabona ogogo emakhaya nxa kuvuma , so ngamafitshane ngithi hulumende khangela abalwa impi yenkululeko, abafelokazi babo lalabo abasele bekhangele intandane zonke le Social Welfare inikezwe imali eyeneleyo ukuze incedise abaswelayo.”
UMnu Austin Vodloza Sibanda ngomunye wabalwa impi yenkululeko ekubutho leZipra.Uthi laloba benanza lelilanga ulokukhathazeka ngabanye bakhe abalokhu bengakabekwa ngokufaneleyo.
“Lelilanga lamaqhawe lamhlanje akusilona ilanga okumele lithathwe lula , lilanga eliqondileyo lilanga elihle kodwa liliphutha lelilanga ngoba amanye amaqhawe sesithethe ilizwe alandelwa yiZanu abulawelwa egangeni afihlwa egangeni pho nxa sesijabulela ukuthi amaqhawe asebenza into enhle ngokukhulula ilizwe laba abafihliweyo embalwini bazajabula nini.”
Esethula umbiko kaMongameli Emmerson Mnangagwa , umphathintambo obona ngezenzakala eZansi yemaNdebeleni uMnu Abedinico Ncube uthe uhulumende uzimisele ukuthuthukisa impilo yabalwa impi yenkululeko.
Emazwini ache uMongameli Mnangagwa ubonge uzulu ngokubekezela kwakhe ngalesisikhathi ebhekane lobunzima bokuqonga kwentengo esithi uhulumende wakhe usebenza gadalala ukulungisa umnotho welizwe.
Inengi lezakhamizi zalelidolobho kazizange zizihluphe ngokuyananza lolusuka njalo umkhokheli wabalwa impi yenkululeko eZansi yemaNdebeleni uMnu Section Ncube uthi kuyadingeka ukuthi uzulu afundiswe ngokuqakatheka kwamalanga afana lala.
