Sokuludaba egudwini okuzanywa libandla leZanu PF elithi lifisa ukuba uMongameli Emmerson Mnangagwa aqhubekele phambili esesikhundleni loba singagqitshwa isikhathi sakhe samahlandla amabili okuhlala ewofisini njengalokhu ukumunyethwe yisisekelo sombuso welizwe.
Isiqa sesisekelo sombuso welizwe esiphawula lokhu sikubeka sobala ukuba umongameli engahlala iminyaka elitshumi esikhundleni kumele engavunyelwa ukuncintisa kolunye ukhetho.
Kungaguqulwa isisekelo sombuso welizwe, ongenayo kuyisuye obebambe isikhundla lesi okweminyaka elitshumi.
Kodwa kukhanya engani ibandla leZanu PF lifuna ukukuguqula konke lokhu libisele uMnangagwa esikhundleni aze ayekogoqwanyawo. Abacubungula ezemithetho abazimeleyo bathi ibandla leZanu PF lilakho ukuguqula iziqondiso zesisekelo sombuso welizwe ezivimba ukuba uMnangagwa engabuyeli esikhundleni.
Okwamanje ibandla elibusayo lilakho ukulandela osokukhulunywa ngamalunga alo athi kumele abuyele esikhundleni libe selisebenzisa idale leHouse of Assembly ekuguquleni iziqondiso lezi ngoba lilamalunga amanengi edale leli.
Kodwa kungani kalilabantu abeneleyo edale leSenate. Isisekelo sombuso sikubeka sobala njalo ukuba kumele kwenziwe iReferendum ukuze kuguqulwe isisekelo sombuso welizwe. Konke lokhu kusezandleni zebandla leZanu PF.
Ukuze sihlaziye udaba lolu, uGibbs Dube weStudio 7 uxoxa loMnu. Malaki Nkomo, ilunga lebandla leZanu PF, loMnu. Nhlanhla Moses Ncube, unobhala jikelele wenhlanganiso yeFreedom Alliance.
UNkomo uthi okukhulunywa ngakho akukavunyelwana kubandla leZanu PF loba wonke umuntu elelungelo lokuxoxisaza ngokwenzeza isikhathi sokuba uMnangagwa ahlala esikhundleni.
UNcube uthi akumangalisi okwenziwa libandla leli ngoba lalikwenza umuyi uRobert Mugabe esesesikhundleni lesi engakakhutshwa ngodlame libutho libambisana loMnangagwa labanye bakhe abagoqela umsekeli wakhe owayekhokhela ibutho uRetired General Constantine Chiwenga.
Forum