Abakubandla le Zanu PF basekela ukuthi kube lomanyano wamabandla eZimbabwe ozakwenza ilizwe lithuthuke ngemfanelo.
Abaxoxe leStudio 7 bathe inkokheli yebandla leli laphikisa uhulumende kaMongameli Emmerson Mnangagwa kumele balandele okufunwa nguzulu hatshi okusenhlizweni zabo.
Umnotho welizwe leZimbabwe ugugudeka okumangalisayo njalo kulendlala enkulu elizweni okulabantu phose abafika izigidi ezilitshumi abadinga ukudla okuphiwa nguhulumende lenhlanganiso ezizimele zodwa.
Kodwa-ke kukhanya engani loba ilizwe libhekane lenhlupho zonke lezi kusakhatshana ukuthi kubelobudlelwano obukhanyayo phakathi kwebandla leZanu PF lele MDC elikhokhelwa nguMnu. Nelson Chamisa.
Umsekeli webandla leZanu PF uMnu. Joseph Tshuma, okudale leCentral Committee, uthi okoniwe ngomlomo kumele kulungiswe ngomlomo.
Siphinde saxoxa ngodaba lokudlelana kwebandla leZanu PF lele MDC, loOstallos Siziba, unobhala jikelele wohlangothi lwabasakhulayo kubandla leMDC elikhokhelwa nguMnu. Nelson Chamisa, othi bangeke bangene kumanyano wePolitical Actors Dialogue.
