Abezempilakahle kanye labomthetho bathi bakhathazekile ngezinga lokuthathwa kwezidakamizwa esigabeni seHwange kusenziwa kakhulu ngabasakhulayo, kanye lamazibulala ngetshefu.
Lokhu kuvezwe embuthwanweni wokuthakazelela ilanga labatsha ngolweSihlanu, eleInternational Day of the African Child lalonyaka eliqhutshwa ngendikamba ethi, ‘Education for all children in Africa; the time is now’ obusenzelwa eNdlovu Secondary School ngaphansi kweNduna uMvuthu.
Osakhulayo, uBhekumuzi Sikhosana, owahlengwa yinhlanganiso yeArise and Shine kulandela ukungena kwakhe kuzidakamizwa lezinezigoqela icrystal meth labo bronco, uxwayise kakhulu intsha ukuba yehlukane lalokhu.
USikhosana uthi wazibona sekusimo lesi ngenhlupho zenhlalo yangekhaya kanye lokuyengwa.
“Babengifosa, kodwa njengomuntu owayengathi ulengqodo, ngaqala ngisesabela khatshana, kodwa ngathi mana ngizwe ukuthi amadoda la akhuluma ngani ngemva kwalokho, akuzange kube kuhle bantwana. Ebusuku ngahlala four days ngingalali, ngingadli, ngingazi vele lokuthi ngenzani loba ngangingaze ngithethise umuntomdala kwakulokhe kufana.”
USikhosana uthi sibi sebusuku wayehamba aze anqunule imvunulo.
"Langendlela oyabe uhamba ngayo uyabe ungesekho right, ngaqala futhi ukuwumana, ebusuku ngibaleka endlini ngibulala amawindi konke lokhu ngangingazi ukuthi sengizifake endaweni embi.”
Obeyisikhulumeli samapholisa kuhlangothi lwezidakamizwa, uDetective Seremani Mwenye uthi okwenzeka kuSikhosana kuyimvana kuntsha enengi.
“Izidakamizwa lezi sezehlise usizi ezigabeni, ezimulini lelizweni lonke, kodwa ngithanda ukukhuthaza lina abancane ukuba libike kithi laba abakuthengisayo lokhu.”
Kutafula labomthetho, amaphilisi afana labo ibrufen, isepa zokugeza ensitha, ama bulb okukhanyisa, intshengu kanye lokunye bekuchayiwe kuthiwa yikho okusetshenziswayo kanye lamapapamper asebenzileyi lama condom okubikwe ukuba asebengenile bayawaxhwathisa bezidake ngawo.
Owomthethi njalo, uNkosikazi Chipo Feya ekuhlangothi lwe Victim Friendly, ukhuthaze abatsha laba ukuba babike izehlakalo zokudlwengulwa.Uthi bakhathazekile ngalokhu.
Ohola isigaba seHwange, uDokotela Fungai Musinami uxwayise njalo abasakhulayo labazali ukuba bengazitholi besenza okungalethi ntuthuko okufana lezidakamizwa.
Uthi ukhathazekile ngetsha ethatha impilo yayo.
"Kulenyanga lonyaka engayayamukela umbiko wabantwana abathathu abazibulalayo. Ngadabuka kakhulu ngoba yibo esikhangelele kibo. Izizatho siyabe singaziqondisisi, kodwa ngithanda ukulikhuthaza ukuba liqakathekise imfundo eyiyo eyikusasa lenu.”
UMusinami uthi njengezempilakhe, sebenanzelele ukuba kweziphathelane lezocansi kanye lokuthelelwanwa kwegciwane kanye lendlela zokuzivikela, inkulumo yande ukugqugquzelwa ebadaleni itshiya abancane, ikanti bakhona abazalwa belegciwane kodwa imuli zibafihlele baze bazi sebethombile.
UMusinami utshele lumbuthwano ukuba kuyadingeka ukuthi abantwana bazi ngesimo sabo, bavikelwe njalo bafundiswe ngokubaluleka kokuthola amaphilisi ngendlela efaneleyo, ukuhlala behlolwa i-viral load kulabo ababanjwa legcikwane, ethi ilizwe lisasilele kulokhu.
Forum