Izisebenzi ezinengi e Zimbabwe zithi isiqondiso sikampathintambo wezemali uMnumzana Tendai Biti sokuthi iholo eliphansi kwekhulu lamatshumi ayisithupha lamadola eMelika ngenyanga ingathathelwa umthelo kayisoze incede ngoba limali ingaphansi kwaleyo ekhangelelwe ukuthi iholwe yizisebenzi ngenyanga.
U Biti uphinde wathi abantu kumele bathole amabonus abo angela mthelo nxa bethola amadollar eMelika aphansi kwangamakhulu amane.
Kodwa izisebenzi zithi lokhu akusoze kuncede ngoba abantu abanengi bethola iholo ephansi kwesilinganiso samakhulu amahlanu amadola eMelika okumele ukuthi nga itholwa yimuli elabantu abayisithupha ngenyanga.
UMnumzana Sifiso Ndlovu unobhala we Zimbabwe Teachers’ Association utshele uGibbs Dube we Studio 7 ukuthi imali ekhulunywa ngu Biti izanceda abanothileyo kuphela.
Kusenjalo, amanye amazwe ancome uhlelo loluhlu lokusetshenziswa kwemali nguhulumende olwe budget lolu olwethulwe edale le phalamende ngu Biti othe loluhlelo lumele lusekelwe ukuze luphathise uzulu weZimbabwe.
Ekhuluma lentathelizindaba e Harare emele inhlanganiso ye Friends of Zimbabwe, umeli wele Germany uDokotela Albert Conze uthe inhlanganiso yakhe isekela uhlelo luka Biti langendlela ahlele ngayo imali lokusetshenziswa kwayo.
Uthe inhlanganiso yakhe izaqhubeka idinga indlela zokuncedisana le Zimbabwe enhlelweni ezithile ngoba intuthuko engaba khona kwezomnotho lenhlalakahle kazulu idinga uncedo lokuphathiswa zinhlanganiso ezitshiyeneyo ezigoqela i World Bank, International Monetary Fund (IMF), African Development Bank (ADB) lamanye amazwe athuthukileyo.
UDokotela Conze uphinde watshela intathelizindaba ye Studio 7 uMark Peter Ntambe ukuthi njengoba ilizwe lingakabi lobudlelwano obuhle lamanye amazwe kanye lenhlanganiso ezitshiyeneyo, kufanele ukuba kubunjwe isikhwama okuthiwa ngesilungu yi multi-donor trust fund esizakwenza ukuthi amazwe athembise usekelo lwemali enelise ukulunikeza kuhulumende we Zimbabwe kalula.
Edolobhebi le Bulawayo uMasawuso Banda ubika ukuthi
inengi lezakhamizi zalelo dolobho zamukele uluhlu lwendleko zikahulumende ngenjabulo zisithi lokhu kuyathembisa ukuhlenga ilizwe ebunzimeni elikubo.
Abakhulume laye ngemva kokwethulwa kwe budget le bathi loba bengalandelanga ngokugcweleyo ukwethulwa kwayo, bakhengelele ukuthuthukiswa kwesigaba seMandebeleni.
Lokhu bathi kumele kwenziwe phezu kokukhonona emphakathini ngokungaqhubeki kwenhlelo ezikhangelelwe ukuthuthukisa lesi sigaba okufana lohlelo lwe Matebeleland Zambezi Water Project.
