Kulandela ukusilela komumbu elizweni abafuyi bengulube sebekhuthazwe ukudingela izifuyo zabo okunye ukudla okungasomumbu.
Inkuthazo le yenziwe emhlanganweni wabafuyi bengulube e Harare lamhlanje yinhlanganiso eye Pig Industry Board.
Umsekeli kamqondisi walinhlanganiso unkosikazi Erica Takaendesa utshele lumsakazo emhlanganweni lo ukuba sikhuluma kanje ilizwe lilokusilela kumumbu olesisindo sama tonne ayisigidi esisodwa.
Kuthi umsebenzi wokufuya ingulube udinga ama tonne angamatshumi amahlanu kusiya kumatshumi amahlanu lanhanu enkulungwane[ 50-55 000 tones] ukuze uqutshwe kakuhle ethi kaboni inani lengulube ezifuywayo lisengezelela lonyaka:
UMnu. Admire Taruvinga ofuya ihotshi ese Mhondoro uthi udubo alalo yikudula kokudla kwezifuyo zakhe okutholakala ezitolo ngasikhathi sinye engakhangeleli ukuthola lutho kusivuno sakhe somumbu lonyaka ngoba izulu liphuze ukufika inhlanyelo yakhe yaphazamiseka.
UTaruvinga uthi njalo imithi yokwelapha ingulube ayisathengeki kalula ngoba lokhu kucina kusehlisa inzuzo yakhe.
Unkosikazi Takaendesa uthi abalimi kumele belandele indlela ezithile ezingabaphathisa kuhlanganisela ukuthengisa ingulube zabo basale lezilutshwana lokwehlisa inani lokudla abazinikeza khona bephinde bedinge indlela zokuzilungiselela ukudla okutshiyeneyo kwengulube:
UMnu. Zakeyo Makono ofuya ingulube ese Masvingo njalo engumlimi uthi ukusilela kokudla kubangele inkinga zokuqhamuka kwezifo zezifuyo zamehlisela isisindo sengulube zakhe.
Unkosikazi Takaendesa uthi kuqakathekile ukuba abantu begcine izibaya zengulube zabo zihlanzekile kuzikhathi ezinje ngoba kungavikela izifo ethi abafuya ingulube ngobunengi bakhuthazwa ukwehlisa inani lengulube ezizalwa emapulazini abo ngomnyaka.
Wengezelele esithi kumele njalo babe lomkhuba wokuthengisa ingulube ezinengi abalazo zikusimo esiphansi kancane ukuze begcine ukudla okukhona kulokumelela ukuthengisa sezilama kilogramme angu 90kgs kusiya phezulu.
Ukoma elizweni sokubangele ukuba labafuya inkomo belahlekelwe kuzabelo phose zonke zelizwe zibulawa yindlala uhulumende yena edinga izigidi lezigidi zama dola ukuba ethenge umumbu ngaphandle kwelizwe wokuphathisa abantu abedlula izigidi ezintathu ukuba bengabulawa yindlala.
