Inhlanganiso ezidhinda amabhuku ziqhubekela phambili zikhala ngokuthi sezibuyiselwa muva ngumsebenzi wokuthengiswa kwamabhuku okungekho emthethweni lokusilela kwemali elizweni osokudinga ukuba kulungisiswe ngokuphangisa ngoba kuzacina kusiba ludubo ukuthola amabhuku asetshenziswa ezikolo.
Abenhlanganiso yabadhinda amabhuku ezansi ye Africa eye Publishers Associaton of Southern Africa bathi ngesimo esikhona kunzima ukuthola abaninibhizimusi abakumsebenzi wokudinda ingwalo abangakhetha ukuzosungula eZimbabwe ngendlela amabhuku athengiswa ngayo ezitaladeni okungekho emthethweni.
Umqondisi wenhlanganiso ezimeleyo eye Zimbabwe Peace Project uNkosazana Jestina Mukoko oselobe ibhuku elimayelana lokuthunjwa lokuthonisiswa kwakhe uthi ucine edhindisa ibhuku lakhe phandle kwelizwe:
UNkosikazi Sazini Moyo oyingcwethi ekulondolozweni kwamabhuku esiphaleni sawo uLibrarian uthi kuyadingakala ukuthi amabhuku afike ebantwini bonke elizweni.
UMukoko uthi ibhuku lakhe lamukelwa ngabantu ngendlela ejabulisayo kakhulu noma elidhindisele ngaphandle kwelizwe. Ethi abantu balakho ukuthola lelibhuku embukisweni weBook Fair walonyaka ethi yena ngokwakhe kakahlaselwa ludubo lwe piracy kuleli bhuku.
Umhlangano wangoLwesibili wabadinda ingwalo kanye labalobi embukiwesni walonyaka owe Zimbabwe International Book Fair 2016 ubukhangela ukuthi abadhindi bamabhuku bangaphathisa njani kunthuthuko.
Uveze lumhlangano ukuba inhlupho zokusilela kwemali elizweni, ukusilela kosekelo kumabhizimusi adinda amabhuku ikakhulu awesikolo sokudinga ukuthi abadinda amabhuku bebambe umhlangano lohulumende bedinga usekelo kuye ngendlela engenza ukuba bedinde amabhuku abo emanengi okuzakwehlisa intengo yawo okungenza umsebenzi wepiracy ube nzima ungasatholi nzuzo
Uhulumende weZimbabwe uhlala esitsho ukuba kavumezi imisebenzi ye Piracy njalo ethi abatholakala bethengisa amabhuku ngalindlela balakho ukubotshwa noma abaloba amabhuku bethi amanyathelo kahulumende kayeneli ngoba esehluleka ukumisa loludubo.
