Abadabuka eZimbabwe abahlala kwele South Africa sebencome indlela amabandla ezombusazwe emukele ngayo impumela yokhetho olusanda kuqhutshwa besithi eleZimbabwe kwakumele lenze okufanayo ngesikhathi sokhetho. Okwamanje ibandla leAfrican National Congress elehluleke ukunqoba kukhetho lolu selikhulumisana lamanye ukwenzela ukubumba uhulumende.
Ekhuluma leStudio 7 ngemva kwempumela yokhetho lweSouth Africa olukuveze kwacaca ukuthi ibandla elibusayo alenelisi ukubumba uhulumende linganxusanga amabandla aphikisayo, umgcinisihlalo webandla elibusayo kwele South Africa, uMnumnzana Gwede Mantashe, ukubeke sobala ukuthi uzulu ukhethe ukuthi amabandla ezombusazwe abuse ndawonye ngakho-ke yikho abazakwenza.
“Kufanele sicabange njengabantu abangadakwanga, sisukume sikhulumisane lamabandla wonke afuna ukusebenza lathi ukuze sakheni uhulumende womanyano.”
Ngakolunye uhlangothi, umkhokheli webandla elikhulu eliphikisayo kwele South Africa eleDemocratic Alliance, uMnumnzana John Steenhuisen, laye uthi kumele amabandla ezombusazwe alandele intando kazulu.
“Kuzafuze sitshengise ukukhula kwezombusazswe sisebenze ndawonye ukuze sithuthukise umnotho wakweleSouth Africa.”
Umkhokheli webandla leEconomic Freedom Fighters uMnumnzana Julius Malema welule isandla sokusebenzisana.
“Siyafisa ukusebenzisana leANC. Nxa kukhona ibandla esingasebenzisana lalo ngcono yiANC, ngoba leli bandla nxa likusimo elikuso lesi liyahlonipha kakhulu.”
Lokhu sekunconywe kakhulu ngabadabuka eZimbabwe abahlala kwele South Africa. Omunye wabo nguMnumnzana Cosmas Ncube.
“Lokhu okwenzakele eSouth Africa ngama elections kubonisa ukuvuthwa lobukhokheli obuqotho kulabo abakade bephethe uhulumende ngoba bavumile ukuthi abawinanga. Kuyatshengisa ukuthi uhulumende weSouth Africa nguhulumende wabantu other than lokhu esikubona ekhaya. Kuyacaca ukuthi lowana nguhulumende wamasotsha ongafuni kwehlulwa.”
UMnumnzana Marko Thebe laye uthi umkhokheli webandla leANC, uMnumnzana Cyril Ramaphosa, nguye okufanele atshayelwe izandla kakhulu ngokwemukela impumela yokhetho waze wathi umphakathi ukhulumile ngakho kufuze alalelwe.
“URamaphosa kadinganga ukuthi atshelwe ukuthi enze icoalition. They made iway forward ukuthi bona they are open for amanegotiation for icoalition. So we are hoping ukuthi as time goes on amaleaders eZanu pf bazafunda.”
UMnumnzana Greatman Mkhwebu uthi zinengi izifundo okuzafuze zifundwe ngamabandla ezombusazwe eZimbabwe.
“So lento eyenzakele eSouth Africa mina ngiyijabulele kakhulu. Sengathi lathi eZimbabwe singayifunda silandele. Sithi ma sivota sikhangele ukuthi iZEC isebenza kanjani ngoba lapha bakwazile ukuthi u IEC bamfake ekhoneni bamonite. Manoma ebelengqondo yokurigger ukhetho bakusuka kube nzima.”
Kusenjalo, amabandla ezombusazwe abika ukuthi ziqhubeka kuhle inkulumo zokubumba uhulumende womanyano. Kukhangelelwe ukuthi inkulumo lezi zibe sezigqitshiwe ngemva kwensuku ezilitshumi lane kumenyezelwe impumela yokhetho ukuze kubunjwe uhulumende.
Forum