AbeZimbabwe abakweleBotswana bahlalele evalweni ngesikhathi umumo womnotho welizwe leli uqala ukutshengisa impawu zokugugudeka. Ukhetho oluzayo lwenza njalo isimo lesi sibe sibi kakhulu ebantwini bokuza.
EleBotswana lizaqhuba ukhetho ngeviki ezayo ngesikhathi sisiba sibi isimo somnotho, esidalwa yikungathengwa kwamatshe aligugu - amadayimani emhlabeni wonke jikelele. Abadabuka eZimbabwe abahlala elizweni leli bathi balakho ukuthwala nzima ekutholeni imisebenzi.
Lonyaka, eleBotswana alithengisanga amadayimani okusuthisayo, amatshe la eyiwo abambe umnotho wakulelizwe, osekudale ukuthi amanye amankampani abike ukuthi kungakhala isigumula emsebenzini. UMnunzana Fortune Phakathi wakweleZimbabwe olebhizimusi yokulungisa okufana lamafiriji, uthi sebeqala ukubona ukuncipha kwamathuba kwezemsebenzi.
"Imsebenzi okwakhathesi ayisatholakali, inengi alisebenzi. Uma sikhangele ibhizimusi engiyanzayo abantu sebebona kungcono ukuthi bazenzele, njalo be hlawulisa imali ephansi okwenza ukuthi silahlekelwe yibhizimusi."
UPhakathi uthi lokhetho oluzayo lufaka ukuthandabuza kwabanye ikakhulu abakubhizimusi.
"Asazi ukuthi kuzazala nkomoni ngesikhathi sokhetho. Kodwa uma kufika isikhathi lesi, uthola ukuthi abantu bayesaba ukuthi befake imali bengazi ukuthi impumela yokhetho izakuba njani."
Banengi abangelamisebenzi okwamanje kweleBotswana abagoqela abokuza abayidinga nsukuzonke. UNkosazana Simangaliso Dube ohlala eGaborone, uthi isimo kweleBotswana ngezemsebenzi siyasiguquka kusibalukhuni.
"Imsebenzi ayisatholakali, imali kayisabambeki njalo lezintho sezidula. Siphila ngokudinga imsebenzi kanye lokuthengisa. Ngitsho ama piece job kawatholakali kukanti imali esiyitholayo kayeneli."
Uthi noma isimo sesiguquka kweleBotswana, kulokhe kulobubelo uma kuqathaniswa lekhaya. UNkosazana Sindiso Sibanda laye uthi isimo somnotho kulez’insuku sizatshiya abanye abeZimbabwe bebhekane lobunzima ngoba kuzabalenguquko ngendlela abantu abasebenzisa ngayo imali.
"Abantu kumele belungiselele ngoba umnotho weBotswana uyaphansi. Sikhangele ukuthi kuzawoma kusiya phambili, abantu bezanciphisa ukuqhatsha abantu ukuthi babayenzele okufana lama piece job leminye imsebenzi.”
EleBotswana lona likhangelele ukuthi kube lobubelo ngomnyaka ozayo ukuthi mhlawumbe isimo sokuthengwa kwamadayimani singakhuphuka. Kodwa okwakhathesi uhulumende usexwayise izizalwane ukuthi zibophe ziqine ngoba kungelamali kusikhwama selizwe.
Okunhlanganiso yezizalwane zeZimbabwe kweleBotswana, uMnunzana Cephas Tshuma, uthi ngaphambi kokukhangela umnotho, uma kuvele kulokhetho elizweni, abokuza bazibuza imbuzo eminengi.
“Ukungahlaliseki kuba khona ngoba uyabe ungakwazi ukuthi kuyangena liphi ibandla. Njalo ungakhangela wena njengomuntu wokuza uyabe usazi iqembu elibusayo. Uyabe ungakwazi ukuthi uhulumende ongenayo uthini ngabokuza.”
EleBotswana lizaqhuba ukhetho lokudinga uhulumende omutsha ngoLwesithathu ngeviki elizayo. Kulokufuthelana phakathi kwebandla elibusayo, eleBotswana Democratic Party (BDP) kanye laphikisayo, wona ayethesa ibandla leBDP umlandu wokusebenzelana leleZANU PF ekuphekaphekeni impumela yokhetho.
Lokhu sekufake abeZimbabwe emehlweni kazulu weBotswana ngesikhathi kuthiwa abanye baphiwe izithupha ukuthi bavotele ibandla leBDP kukhetho oluzayo. Ibandla leZanu PF liyakuphika lokhu.
Forum