Abantwana ababili abeZimbabwe baphakathi kwabantu abayisitshigalolunye ababhubhe ngemva kokuna kwezulu lesikhukhula kweleBotswana ngeviki edluleyo. Abanye abeZimbabwe bazithola bengelandawo zokuhlala sebethembele kusizo oluvela kuhulumende weBotswana.
Umphathintambo obona ngendaba zehofisi kamongameli weBotswana, uMnumzana Moeti Mohwasa ugcizelele ukuthi kuze kufike uMvulo, sekubhubhe abantu abayisitshigalolunye, ababili kungabadabuka kweleZimbabwe.
Ababili laba ngabantwana, omunye obe eleminyaka emihlanu (5) omunye elitshumi lasikhombisa (17) abagalule emfuleni okuthiwa nguNtshe osedolobheni le Francistown.
UMnu. Mohwasa uthi uhulumende uzaphathisa imndeni elahlekelweyo kanye lalabo abazithola bengalandawo zokuhlala.
"Noma nje sekulobungcono, siyadana ukuthi silahlekelwe ngomunye ngeSonto, okutsho ukuthi sekulabantu abayisitshiyagalolunye asebebhubhile."
Kodwa ihofisi yommeli wesigodlo seZimbabwe kweleBotswana ithi kayizange ithole isaziso esivela kuhulumende weBotswana ngokubhubha kwababili laba.
Kune izulu elinengi ngeviki esanda ukwedlula eBotswana, elibikwa lifike kuma milimitha aphakathi kwekhulu elilengxenye (150mm) kusiya kumamilimitha angamakhulu amabili (200mm).
Lokhu kubone inengi, okugoqela abanye abeZimbabwe, lihlengwa ngamasotsha emzini engcelelane leGaborone lapho okuledamu elikade selichitheka.
UMnu. Mohwasa ugcizelele wathi noma nje isimo sesisibangcono, lokhe kulokwesaba ngoba izulu lilakho ukuqhubeka lisina kusiyafika ekupheleni kweviki, lanxa kukhangelelwe ukuthi liyabe selilesilinganiso esiphansi.
“Noma nje sekulobubelo, asikaphumi engozini, indawo ezitshiyeneyo lokhe zilamanzi amanengi ngakho kumele siqhubeke sifake ilihlo.”
UMnumzana Kutlwano Mukokomani owenhlanganiso ebona ngokuphathisa uzulu ngezikhathi zobunzima eye Red Cross Society, uthi abakhethi mhlobo lapho besesabela abazithola bephakathi kwengxaki elethwe lizulu lesikhukhula.
"Sesiphathise labo abaphatheke kulengozi ngokubanika okufana lengubo, ukudla kanye lalapho abalala khona ukuze sibone ukuthi bathola usizo."
Isizalwane seZimbabwe, uMnumzana Andreas Sibanda, uthi babone abanye abekhaya bephathiswa, okugoqela ukuhlengwa kwabasebenza emapulazini endaweni eziseduze ledamu leGaborone.
“Kukhanya abantu bonke bayaphathiswa kungela bandlululo, sibone amasotsha esiyancedisa abanye abeZimbabwe abazithole besenkingeni kweyinye indawo phandle kweGaborone.”
Inengi labahlengiweyo beliphiwa indawo zokulala kanye lokudla ezikolo zikahulumende.
EleBotswana lithi abantu abedlula inkulungwane lamakhulu ayitshiyagalombili - 1,800 bazithole bengelandawo zokuhlala, kunani leli, abedlula amakhulu ayisitshiyagalo mbili (800) kungabantwana.
Izikolo zavalwa ngeviki edluleyo kodwa kukhangelwe ukuthi zivulwe ngoLwesibili. Inhlanganiso ebona ngendaba zabantwana umhlaba wonke jikelele, eye United Nations Children’s Fund, ithi isimo lesi siphazamise abafundi abedlula inkulungwane ezingamakhulu ayisithupha - 600,000.
Forum