Abasanda kubhidlizelwa izindlu zabo emzini we Budiriro, eHarare abangamalunga eTembwe Housing Coorporative, bangene umhlangano loMayor we Harare ucouncillor Benard Manyenyeni, bekhalaza ngesenzo sikamanisipala, befuna kudingwe indlela zesiphangiphangi zokubatholisa indawo zokuyahlala njengoba izulu selizakuna.
Laba bantu bathi bafuna njalo kwenziwe inhlolisiso yokudingisisa okuyikho okwenzakalayo ekubhidlizweni kwezindlu lezi ngoba zakhiwe endaweni ezingekho emthethweni edolobheni leHarare, bethi ngoba kuphambana lemithetho yelizwe.
Omunye wamalunga eTembwe Housing Cooperative,unkosikazi Desire Machokoto lowo, obhidlizelwe umuzi wakhe kunsukwana ezisanda kwedlula ubekhihliza ezimathonsi ekupheleni komhlangano wezakhamizi loMayor weHarare umnumzana Benard Manyenyeni, owenzelwe e Town House.
Unkosikazi Machokoto ethi abasela phahla, kunje bahlala egcekeni, ngakhoke sebephelelwe njalo sekungokwesibili bebhidlizelwa izindlu zabo bengamalunga alitshumi lantathu - 13 , ale khopha ye Tembwe, beke bazibhidlizelwa njalo mhla zilitshumi lambili ngoNgcwabakazi.
Umkakhe, umnumzana Sheperd Machokoto ndawonye lomnumzana Wilbert Bondera babikwa belinyaziwe kulesi sehlakalo, befela ukuba befune ukuzwisisa ukuba kungani kusenziwa kibo yona ikhopha yabo yabhaliswa kumanisipala okusemthethweni.
Kusenjalo inhlanganiso ezilwela ilungelo zezakhamizi zithi sezasise amagqwetha azo asebenza phansi kwenhlanganiso yamagqwetha alwela ilungelo loluntu eye Zimbabwe Lawyers for Human Rights ( ZLHR ), ukuba lusiwe emthethwandaba loludaba, ukuze zihlawulwe phezu kokubhidlizelwa impahla yazo, ngoba okwenziwe ngumanisipala kuphambana lemithetho yelizwe.
Enye yalezi nkokheli yeinye yalezi nhlanganiso zezakhamizi, e ye Chitungwiza Residents Trust -CHITREST, umnumzana Marvelous Khumalo uchasisa ngomhlangano wangoLwesihlanu.
Izakhamizi zisebunzimeni ngemva kwalokhu kubhidlizwa kwezindlu zeBudiriro kuveza uKhumalo.
Umqondisi we Combined Harare Residents Association – CHRA, umnumzana Mfundo Mlilo, yena uthi lanxa uMayor ethembisile ukuluhluzisisa loludaba akamkholwa ukuthi uqinisile ngoba kungasi kwakuqala lokhu kusenziwa.
Kunengi okufiswa yinhlanganiso yabo ukuthi ngabe umanisipala uyakwenza ukulungisisa udaba lokubhidlizwa izindlu kwalabo ababikwa bakhele endaweni ezingekho emthethweni, kutsho uMlilo.
Lezi nhlanganiso zithi zifuna njalo ukuyakwethula ingcwadi yezikhalazo kwabe Zimbabwe Human Rights Commission ukuba baluhlolisise labo loludaba.
Zithi yikhona kuzaqoqwa inhlelo zokutshengisela ukukhonona kwezakhamizi phezu kodaba lokubhidlizwa kwezindlu edolobheni le Harare.
UMayor we Harare, uthembise ukuba luzakhangelisiswa kudingwe ukuba okwenziwa yizisebenzi zikamanisipala kusemthethweni na loba hatshi.
