Ababhala imihloliso ye "O" le “A” level eZimbabwe, bavula izikolo ngoMvulo mhla zintathu ngoZibandlela ngemva kokuthatha ikhefu elifitshane lamaviki amabili. Ugatsha lwezemfundo luthembise uzulu ukuba luzaqinisa ukulandelwa kweziqondiso zokuzivikela ekuthelelweni iCOVID-19 lanxa nje inani labantu asebebanjwa yiyo selisehla elizweni.
Abafundi be O-level bazaqhubeka ngokubhala imihloliso mhlaka 3 Zibandlela baze bayegqiba ngokuphela kwenyanga mhlaka 31. Kuthi abe A-level bona bagqiba mhlaka 24 Zibandlela.
Unkosazana Wayne Maphosa umfundi obhala imihloliso uthi sekhangelele ukuqedisa imihloliso yakhe.
“NgeMonday next week ngibhala iBiology. Mina ngibona kungcono ukuthi sibhale siqede ukuze sihambe ku A level kusaselesikhathi. Yingozi yomkhuhlane weCOVID-19 siyayibona sibili kodwa ngeke simise ikusasa yethu ngumkhuhlane lo. Lathi njengabafundi sizazama ukulandela zonke izixwayiso zeCOVID."
Unkosikazi Charity Mvundla umzali olomntwana ovula ngoMvulo ozayo uthi isikhathi abasiphiweyo sincane kakhulu ukuthi bahlanganise imbadalo zesikolo.
"Singananzelela ukuthi ikhefu ebesiliphiwe belilincane kakhulu. Uyathi ukhangele ikhisimusi ngapha abantwana bafuna lokhu lalokhuyana uthi lama fees kucina kunzima kakhulu. Aluba bebeyekelile ukuthi kuviki le ezayo maybe bekungaba ngcono ngoba khathesi imali ayikho ukuthi sihle sibhadale ama fees.”
Unkosikazi Thobekile Shoko omunye njalo umzali wakoBulawayo yena ukhala ngokuthi ukuvulwa kwesikolo kuzafaka abafundi engozini yokuthelelana iCOVID-19.
“Kuhle ukuthi abantwana sebesiya qedisa ukubhala imihloliso. Into esipha uvalo yiCOVID, yebo kambe ama case ayehla kodwa nxa abantwana besuka endaweni ezehlukeneyo besiba ndawonye kulengozi yokuthi bathelelane umkhuhlane kalula ngoba ukuthi sithi yonke imithetho yeCovid iyalandelwa vele kunzima kubantwana. Sesikhulekela ukuthi baphephe kuphela.”
Umnumzana Fortune Jamela isiphathamandla senhlanganiso yababalisi eye Amalgamated Rural Teachers Union of Zimbabwe (ARTUZ) uthi ababalisi ngokwabo bayehluleka ukubuyisela abantwababo esikolo ngenxa yokuswela imali.
"Ngalesisikhathi nxa sikhangele ukuthi izikolo ziyavulwa siyabe sikubona nje ukuthi uHulumende ulendlela zakhe ukuthi azame ukithi afake ukuthi isimo silungile. Kodwa akulasimo esilungileyo. Nxa sithi siyakhangela imiholo yababalisi, ababalisi abala mali yokuthi babuyele esikolo. Kubi nje ngalesisikhathi ngoba lama fees akhwelile , abalamali ukuthi babisele abantwana babo ezikolo, umkhuhlane lokhe ubheda ngendlela obheda ngawo. Kunzima nje kakhulu ukuthi uHulumende azenze engathi uyanakekela abantu enganakekeli abantu. UHulumende kenze okufaneleyo akubovelwayo abekwazi ukuthi abantu bakukhangele konke akwenzayo. Engathi izikolo ziyavulwa abantwabethu bayebulawa yimikhuhlane.”
Imizamo yokuxhumana lesikhulumeli sogatsha lwezemfundo umnumzana Taungana Ndoro yehlule ngoba ucingo lwakhe lungangeni. Kodwa uthe ekhuluma lephephandaba le Chronicle uNdoro uchaze ukuba abafundi ababhala imihloliso bayavula ngoMvulo ozayo njengalokhu obekuvele kuhleliwe. Ugcizelele ngokuthi iziqondiso zonke ezokwehlisa ukumemetheka kweCOVID-19 zizalandelwa ngokugcweleyo. Uthi njalo abanye bonke abafundi abangabhaliyo imihloliso bazavula njengalokhu okwakuhleliwe mhlaka 10 Zibandlela ngaphandle kokuba kube khona inguquko engabakhona.
Ugatsha lwezempilakahle lukhiphe umbiko wokuba kuphela usuku lwayizolo kubanjwe abantu abayinkulungwane phose lekhulu (1 098) , kwabhubha phose a angamatshumi amabili (17). Kuthi inani labantu abagula umkhuhlane lo elizweni lonke selehlile layafika kunkulungwane ezingamatshumi amathathu lantathu lamakhulu ayisitshiyagalombili (33 824).
