Umkhokheli welinye lamacele eMDC uMnu Morgan Tsvangirai lenye inkokheli yebandla lakhe bake bathathelwa incwadi zabo zokuhambisa ipassport lamuhla eseHarare International Airport.
UTsvangirai, lonobhala jikelele webandla lakhe, uTendayi Biti kanye lonobhala obona ngokwenzakala phandle kwelizwe, uMnu Eliphas Mukonoweshuro bebesiya kwele South Africa lapho abanxuswe khona emhlanganweni weSadc oqala kusasa.
Lumsakazo ukuvezile izolo ukuthi bekulembiko ethi uhulumende ucebise izisebenza zogatsha lwe immigration ukuthi zithathele inkokheli yeMDC ingwalo zazo zokuphuma elizweni.
Bobathathu bebemele besuke eZimbabwe emini, kodwa bacine bebuyiselwa ama passports abo ntambama. Incwadi kaTsvangirai yokuhamba, i Emergency Travel Document (ETD) ibikwa ibingalotshwanga ukuthi kumele aye kweleSouth Africa okubangele ukuthi ehluleke ukuhamba lamuhla.
Kodwa uBiti wenelisile ukusuka elizweni. UTsvangirai ukhangelelwe ukuya eSouth Africa kusasa lomsekeli kamgcini ngcebo, uMnu Elton Mangoma kunye loMukonoweshuro. UTsvangirai ngokwakhe utshele iStudio 7 ukuthi kabazange banikwe isizatho sokubathathela incwadi zabo zokuhambisa, esithi isehlakalo lesi siveza mhlophe ukungazinikeli kweZanu PF kunkulumo.
UTsvangairai, uMongameli Mugabe kanye loMnu Arthur Mutambara, okhokhela elinye icele leMDC banxuswe ukuthi lo owakusasa langoMgqibelo bethulele lumhlangano okwenzakala kunkulumo zokuxazulula inkinga yombusazwe weZimbabwe.
Sixhume intathelizindaba yethu uThomas Chiripasi obeseHarare International Airport obone uTsvangirai leziphathamandla zakhe bethathelwa incwadi zabo zokuhambisa emini echasisa ngokwenzakeleyo.
Kunjalo nje, umkhokheli welinye icele leMDC uMnu Arthur Mutambara lequla lakhe basuka kusasa ekuseni kanye loMongameli Mugabe. UMutambara, uMugabe kanye loTsvangirai bazahlangana loMongameli Thabo Mbeki ekuseni munye ngamunye lequla lakhe andubana behlangane njalo ngokufanayo, lequla leSadc troika elibona ngezomvikela lezombusazwe belazisa ngokuhluphayo kunkulumo phakathi kwabo esezimile okwamanje.
NgoMqgibelo bazangena njalo umhlangano weSadc ngokwawo beveze ukuthi behlulana ngaphi lokuthi kuyini asebekuvumelene. Ukudingisisa okwenziwe yiStudio 7 kuveze ukuthi ugatsha lweJoint Operations Command (JOC), okuyilo olubikwa luphethe intambo zombuso okwamanje, yilo olunike isiqondiso sokuthi uTsvangirai lenkokheli yebandla lakhe bathathelwe amapassport abo.
Kodwa izizatho zalokhu aziphumi mgceke njengoba bephinde bawanikezwa amapassport la. Unobhala obona ngezenzakala phakathi kwelizwe kuMDC kaTsvangirai uMnu Sam Sipepa Nkomo, esikhulume laye uTsvangirai engakabiselwa ipassport yakhe usole kakhulu okwenzakale lamuhla esithi kuveza sobala ukuthi iZanu PF ayizinikelanga kunkulumo.
Ingcwethi ecubungula ezombusazwe uMnu Last Moyo uthi uzulu weZimbabwe sekhangelele kumhlangano weSadc oqala kusasa ukuthi uxazulule inkinga ezikhona.
