EleZimbabwe lamuhla linanze ilanga lamaqhawe (i National Heroes Day) endaweni ezehlukeneyo lapho iziphathamandla zikahulumende ezifundele khona uzulu umbiko kaMongameli Mugabe.
EHarare uzulu ubuthene emathuneni eNational Heroes Acre lapho yena ngokwakhe uMugabe akhulume khona. Emadolobheni abantu bebethwalwa ngamabhasi besiwa endaweni zokunanza lelilanga.
Ekhuluma emkhosini lo, uMugabe usole amazwe afana leAmerica kanye leBritain esithi engabongenela endabeni zeZimbabwe. UMugabe uphinde waxwayisa abakunkulumo zokuzama ukulungisa umumo elizweni athi basetshenziswa ngamazwe aphetsheya, esithi kumele batshiyane lomkhuba lo.
Amazwi la amukelwe ngabanengi njengokuthi ubethuka uMnu Morgan Tsvangirai ahlezi emethesa umlandu wokusebenzelana labakwamazwe angentshonalanga. Abecele leMDC elikhokhelwa nguMnu Tsvangirai bebengekho emkhosini wamaqhawe lo.
Kodwa ezinye iziphathamandla zecele leMDC kaMnu Arthur Mutambara, okugoqela yena uMutambara ngokwakhe bezikhona emathuneni eNational Heroes Acre. Edolobheni lakoBulawayo, inhlangansio ezibiza ngokuthi liBhetshu likaZulu ibiqoqe umbuthano wokunanza amaqhawe esigabeni seMandebeleni.
Lumbuthano
obusesigodlweni seAmakhosi Theatre ulethe ndawonye abalwa impi yenkululeko ku Zipra, izakhamizi zakoBulawayo labasakhulayo abenhlanganganiso yeBhetshu
likaZulu le. Umqondisi wenhlangansio le uMnu Qhubekani Dube uchasisele uBrenda Moyo weStudio 7 okunengi ngombuthano wabo.
Abalaleli bethu, abathi uMnu Mduduzi Sibanda loMnu Jonah Nyoni batshele uBrenda Moyo ukuthi uzulu
kasalinanzi ikhefu lamaqhawe ngoba ebhekane lendubeko ezinengi.
Kunjalo, nje isikhulumi seMDC ekhokhelwa nguMutambara uMnu Edwin Mushoriwa utshele iStudio 7 ukuthi abebandla lakhe abahambe emkhosini weHeroes Day bengaba bebezidingela umsebenzi kuhulumende ozayo.
Ebuzwa yiStudio 7 ukuthi lokhu kungaba kugoqela uMutambara ngokwakhe na njengoba laye ebekhona kulumkhosi, uMushoriwa uthe ubengeke etsho kodwa wathi aleqiniso lakho yikuthi uMutambara uye kulumkhosi elilunga elizimeleyo hatshi umkhokheli weMDC.
Lamuhla khona uMutambara wethule umbiko ophume emaphephandabeni atshiyeneyo esola amazwe afana leAmerica kanye leBritain esithi kumele atshiyane lomkhuba wokungenela kudaba lweZimbabwe.
Ingcwethi ecubungula ezombusazwe uMnu Last Moyo usole umbuko kaMutambara esithi kusobala ukuthi uMutambara sedinga umsebenzi kuZanu PF. Ubekhuluma loNtungamili Nkomo weStudio 7.
