Inkulumo phakathi kwebandla leZanu PF lamacele womabili eMDC zibikwa zizaqala kusasa kumbe ngoLwesine kweleSouth Africa.
Inkulumo lezi zilandela ukulobelana phansi isivumelwano sokuziqondisa phakathi kukaMongameli Robert Mugabe labakhokheli bamacele eMDC uMnu Morgan Tsvangirai loMnu Arthur Mutambara izolo eHarare bezinikela ukukhulumisana ukuze udaba lweZimbabwe lulungisiswe.
I MDC ekhokhelwa nguMutambara imelwa nguMnu Welshman Ncube loNkosikazi Priscillar Misihairambwi-Mushonga kulezi nkulumo kuthi ekhokhelwa ngu Tsvangirai imelwa nguMnu Tendai Biti loMnu Lovemore Moyo. I Zanu PF yona imelwa nguMnu Nicholas Goche loMnu Patrick Chinamasa bona abatshone emhlanganweni loMugabe lezinye iziphathamandla zeZanu PF lamuhla beqoqa izimiso abazangena kulezinkulumo beziphethe.
Unobhala
jikelele weUnited Nations uMnu Ban Ki-Moon wethule umbiko lamuhla ekhuthaza
amabandla la ukuthi akhulumisane ngobuqotho langokuzinikela kulungisiswe
uhlupho lweZimbabwe ngokuphangisa. Inkulumo lezi zibikwa zimele ziqhutshwe
phakathi kwamaviki amabili alandelayo.
Kodwa ingcwethi ecubungula ezombusazwe
uMnu George Mkhwanazi utshele uNtungamili Nkomo weStudio 7 ukuthi isikhathi lesi sifitshane ngoba ukuvumelana entweni
zonke kuzakuba nzima, esithi iMDC ingavele itshade leZanu PF izab’ siyephule
imoya yabantu abanengi eZimbabwe.
