Abakhokheli bamacele womabili eMDC lamuhla balobelane phansi isivumelwano loMongameli Robert Mugabe seziqondiso zokuthi inkulumo phakathi kweZanu PF leMDC zizaqutshwa njani emizameni yokuqeda udubo lweZimbabwe.
UMnu Morgan Tsvangirai loMnu Arthur Mutambara bahlangane loMugabe lamuhla eHarare lapho abalobelane khona isivumelwano senkulumo lesi. UMongameli Thabo Mbeki weSouth Africa, ongumlamlankunzi kudaba lweZimbabwe ubekhona abakhokheli laba belobelana phansi lesi sivumelwano.
Isivumelwano lesi sihlela ukuthi inkulumo ezizalandela zizakwenziwa phansi kwendikimba bani lokuthi yiziphi izinto ezimqoka ezimele zilungisiswe. Ebingelela uMongameli Mugabe, uMnu Tsvangirai umnanze ngenjomongameli webandla leZanu PF hatshi uMongameli weZimbabwe.
Abakhokheli bobathathu bathembise ukuba bazimisele ukukhulumisana ukuze kuqedwe udubo olukhona. Beqeda umhlangano wabo lentathelizindaba bangene emhlanganweni wabo bodwa.
Inkulumo ezimqoka zizaqalisa kuliviki njalo isivumelwano salamuhla sithi inkulumo lezi kumele ziqhutshwe phakathi kwamaviki amabili alandelayo, kubika intathlizindaba yethu uMark Peter Nthambe.
Kusenjalo, ingcwethi ecubungula ezombusazwe uMnu Last Moyo utshele uNtungamili Nkomo weStudio 7 ukuthi laloba okwenzakale lamuhla kuletha ithemba ebantwini beZimbabwe, indlela ikhanya izakuba lukhuni phambili ngoba amabandla la elakho ukungavumelani ukuthi udubo olukhona lulungisiswe njani.
