Inkulumo zokuzama ukulungisisa okuhluphayo kuhulumende womanyano phakathi kweZanu PF leMDC zizaqala ngolweSihlanu eHarare.
Abamela iMDC ekhokhelwa nguMnu Morgan Tsvangirai kanye labeZanu PF bahlangane loMnu Tsvangirai ngoMvulo bahlela ukuthi inkulumo lezi zizaqhutshwa njani.
Kube lokuvumelana emhlanganweni wangoMvulo lo, ukuthi inkulumo ziqale ngolweSihlanu, okulilanga lapho okwanela khona amalanga alitshumi lanhlanu abekwe yiSadc Troika mhlaka 5 kuyonale inyanga ukuthi inkulumo lezi zibe seziqalisile.
Abamela icele leMDC elikhokhelwa nguMnu Arthur Mutambara bebengekho emhlanganweni wangoMvulo, kodwa babikwa bezaphatheka enkulumeni eziqala ngolweSihlanu.
Umphathintambo obona ngokwenzakala ewofisini kaTsvangirai, uMnu Gorden Moyo utshele uNtungamili Nkomo weStudio 7 ukuthi inkulumo lezi zizaqhubeka ngempelaviki, esithi bafuna okuhluphayo kuhulumende womanyano lo kulungiswe ngokuphangisa.
