UMongameli Armando Guebuza wakwele Mozambique, ekhuluma ngolweSine ekusungulweni komhlangano weSADC Troika, owokuhlaziya udaba lweZimbabwe, ukhuthaze ukubambana kwenkokheli kahulumende womanyano ukuze kuvuselelwe ilizwe.
Umhlangano lo uqhutshelwe kweleMozambique njalo ungenwe nguMongameli Robert Mugabe, inhloko kahulumende uMnu Morgan Tsvangirai lomsekeli wakhe uMn Arthur Mutambara lezinye iziphathamandla zikahulumende lo.
Ekhuluma ngaphambilini komhlangano lo unobhala weSadc uMnu Tomaz Salomao utshele intathelizindaba ukuthi ulethemba lokuthi iSadc isazithola isisombululo sokuxazulula udaba lweZimbabwe.
Ingcwethi ecubungula ezombusazwe uMnu Joshua Mhambi utshele uBrenda Moyo weStudio 7 ukuthi kalathemba lokuthi iSadc izakwenelisa ukulungisisa okuhluphayo kuhulumende, esithi abantu beZimbabwe kumele bazilungisele bodwa inkinga ababhekane lazo.
Inengi likazulu lithi lesabela ukuthi kungaqhubeka ukudonselana okukhona phakathi kweMDC leZanu PF, uhulumende womanyano lo engabhidlika konakale into ezinengi elizweni.
Ukuhlaziya ingxabangxoza ekhona kuhulumende lo, sixhume igqwetha uMnu Matshobana
Ncube lengcwethi ecubungula ezombusazwe uMnu Brilliant Mhlanga. UMhlanga uqale ngokuchasisela uNtungamili Nkomo weStudio 7 ukuthi uhulumende lo engahlengwa njani.
