ISadc Troika ithi sinxuse umgcinisihlalo weSadc jikelele uMnu Joseph Kabila kanye loMongameli weSouth Africa, uMnu Jacob Zuma ukuthi labo baphatheke emhlanganweni wokuzama ukulungisisa udaba lweZimbabwe ngoLwesine eMozambique.
Abakhokheli bamacele womabili eMDC abathi, uMnu Morgan Tsvangirai kanye loMnu Arthur Mutambara basuke eHarare ngoLwesithathu belubhekise kweleMozambique. UMongameli Mugabe yena ubikwa ezabalandela ngoLwesine ekuseni.
Amazwe abumba iSadc Troika yiSwaziland, Mozambique leZambia. Abakhokheli bamazwe la yibo abazakhokhela umhlanganeni wokuhlaziya ingxaki ezihluphayo kuhulumende womanyano kwele Zimbabwe.
I Troika ithume iqula layo eHarare ngeviki edlulayo ukuyahlaziya indlela uhulumende asebenza ngayo. Inhlanganiso yeOpen Society Initiative for Southern Africa ixwayise ukuthi iSadc ingehluleka ukulungisisa okuhluphayo eZimbabwe, kulakho ukuqhamuka udlakela elizweni.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi ukuphatheka kweSouth Africa leDRC njengomgcinisihlalo weSadc emhlanganeni weTroika lo, kulakho ukunceda ekuthini kutholakale isisombululo kungxaki zeZimbabwe.
